Arteko Gure Ama Jaiak aste honetan hasiko dira. Biharko Hiriska elkarteak “Conquistando Las Vegas” antzerkia antolatu badu ere -19:00etan zahar-etxean-, txupinazoa ostiralean izango da.
21:00etan izango da pregoiaren irakurketa eta txupina Goiko plazan -estreinekoz hautatu dute leku hori jaiei hasiera emateko-. Ordu erdi lehenago zurrakapotea banatuko dute eta Akelarre txarangak alaituko du giroa.
22:00etan pilotari ohien partidak jokatuko dituzte eta 22:30etan KM 11 taldeko kontzertua hasiko da. Jarraian Trikidantz erromeria egongo da. Gainera, erromeriaren atsedenaldian Kulero eta Galtzontzilo lasterketa egingo dute.
Larunbata
Larunbaterako egun osoko egitaraua prestatu dute -pintxo lehiaketa, herri bazkaria, kontzertuak...- baina ekintzarik herrikoi eta deigarriena 19:30ean izango da Goenkalen, Bonbona eta Garrafa lehiaketa, alegia.
Igandea
Iganderako egun lasaiagoa aurreikusi dute antolatzaileek eta kirolak izango du protagonismo handia txikien lasterketaren, kronoeskaladaren eta Artzikirol partiden eskutik.
Bigarren asteburua
Irailaren 12an eta 13an ere jaien ospakizunekin jarraituko dute Artziniegan. Larunbatean Arteko Landako herri bazkariarekin hasiko dute egitaraua eta jolasak, salbea eta jaitsieraren ostean eskupilota partidak izango dituzte. Musikaren aldetik Honat erromeria taldeak kontzertua eskainiko du eta Las Tea Party DJ-ek emanaldia egingo dute 02:00etatik aurrera.
Igandean gastronomia eta kirola izango dira protagonistak. 09:00etan Marmitako eta Patata Tortilla Txapelketa abiatuko dute. 11:00etan bizikleta lasterketa egongo da eta mus txapelketa eta herri kirolen erakustaldiaren ondoren koadrilen arteko erronka gauzatuko dute.
20:00etan erromeriaren eta odolosteen txanda helduko da 23:00etan jaiak agurtzeko.