Beste behin, Artziniegako Udalak, Arabako Elikagaien Bankuarekin batera, elikagaien bilketa antolatu du, udalerrian laguntza behar duten familia eta pertsonei ahal duten neurrian laguntzeko.
Hori dela eta, Artziniegako Udalak gaur, ekainaren 26an eta bihar ekainaren 27rako, elikagaiak biltzeko beste kanpaina hau antolatu du. Besteak beste, hauek izango dira elikagaiak biltzen egongo diren guneak: Unide Supermerkatuak, Jakitoki, La Despensa de la Abuela eta Izar fruta denda. Non horietako bakoitzean, boluntarioak egongo dira, bai Artziniegako herritarrak bai zenbait elkarteetako kideak.
Oraingo bilketan lehentasuna izango dute haurrentzako elikagaiak, aurrez prestatutako produktuak –kasu askotan elikagaiak prestatzea ezinezkoa baita– eta higiene pertsonalerako eta garbiketarako produktuak. Gainera, ohiko beste produktu batzuk ere batuko dituzte: lekaleak, arroza, pasta, olioa, esnea, atuna…
Asteburuan bildutako guztia Arabako Elikagaien Bankuak ematen duen zerbitzuari laguntzeko bideratuko dute, orain arteko lan altruistarekin jarraitzen laguntzeko. Izan ere, ohiko beharrak egoteaz gain, garai hauetan eskolako jangelak itxita egongo dira udako oporrak direla eta. Gainera, nabarmentzekoa da, eginkizuna gauzatzeko, Udalak hasieratik jaso duela oinarrizko gizarte zerbitzuen, Arteko Gure Amaren zuzendaritza-taldearen eta parrokiaren laguntza zein koordinazioa.