Biharko udal osoko bilkurako giroa berotu da Artziniegan EH Bildu eta EAJren arteko ika-mika dela eta.
Atzo bi alderdiek oharrak zabaldu zituzten ordura arte izandako bileren inguruan. EH Bilduk facebooken bitartez azaldu zuen PPk iragarri ziola litekeena dela EAJren alde bozkatzea.
EAJko Uri Buru Batzarrarekin izandako bileraren inguruan koalizioak plazaratu zuenez jeltzaleek ados zeuden EH Bilduren hausnarketarekin. Hala ere, aurkeztea EAJko zerrendakideen dagokiela argitu zuten Uri Buru Batzarreko kideek, beti ere koalizio independentistaren arabera.
Bukatzeko, EH Bildu EAJko udal taldearekin elkartu zen. Jeltzaleek ez omen zioten ezer aurreratu baina nabarmendu zuten EH Bilduk 11 botore aldearekin baino ez zuela irabazi eta ondorioz EAJk zilegitasun osoa duela Iñigo Gomez alkategai aurkezteko.
EAJren erantzuna eta salaketa gogorrak
EAJko Uri Buru Batzarrak ohar baten bitartez erantzun dio EH Bilduk zabaldutako informazioari. Jeltzaleen ustez faltsukeriez beteriko bertsioa eskaini du koalizioak.
EAJk salatu du EH Bilduk gezurrak esan dituela ez direlako alkatetza eskuratzeko gainerako indar politikoekin akordioak erdiesteko gai.
Gainera, EAJk adierazi du EH Bilduren partetik mehatxuak jaso dituela, EAJk zerrenda aurkeztuz gero liskarrak egon daitezkeela esanez.
Jeltzaleek erantsi dute EH Bilduk facebooken bidez zabaldutako testua errespetu falta izan dela eta bi alderdien arteko konfiantza apurtu duela.
Hori guztia aintzat hartuz erabakiko du EAJk zer egingo duen biharko udal osoko bilkuran.
Bukatzeko, lasaitasuna eskatu dute jeltzaleek biharko udalbatza normaltasunez egin dadin.