Artziniegako udalak martxoko udalbatzan onartu ditu 2015eko aurrekontuak EAJren aldeko bozekin eta PP eta Bilduko abstentzioari esker. 1.754.600,82 eurokoa da aurrekontua, 2014an aurreikusitakoa baino % 3,1 handiagoa da.
Udal Gobernu Taldeak azpimarratu du inbertsioen kapituluan 103.284,62 euro daudela jasota eta bereziki nabarmentzekoak jo ditu Gernika hiribidea asfaltatzeko partida, kiroldegiko ur beroaren eta berogailuaren instalazioa aldatzea eta hobetzea, eta alde zaharrera sartzeko sistemetan abisu-semaforoak instalatzea.
Udalak adierazi du 832.506,63 euroko soberakinarekin itxi duela 2014 ekitaldia. Soberakin zati bat udalerrian inbertituko dute. 300.000 euro udaletxetik eskolara doazen espaloiak egiteko erabiliko dituzte.
Inbertsio gehiago
Lan gehiago aurreikusi dituzte: La Ventara eta Gordelizera ura eramateko obrak, termitak kontrolatzeko lanak, Garay plazako kulunkak hobetzea, udaletxeko biribilguneko eremua egokitzea, udal-igerilekuen arazketa-sistema aldatzea; Erretes Tuterako urtegirako bidea asfaltatzea, Artea Gure Ama ikastetxe publikoan hobekuntza-lanak egitea eta udaletxeko bigarren solairua egokitzea, igogailua instalatzeko obrak amaitzean.