Hauteskundeetarako zerrenda eta programaren eraketa modua zehazteko, EH Bilduk batzarra deitu zuen pasa den urriaren 24an.
Bertan, hurrengo legealdian jarraituko den programaren idazketa, behin zerrendaren lehenengo lau hautagaiak behintzat hautatuta daudenean egitea erabaki zen.
2011ko udal hauteskundetan Bilduk 335 boza jaso zituen 3 zinegotzi eskuratu zituelarik. Zerrendaren eraketarako kopuru hori zehaztu zen, laugarrena eskuratzeko bozka gutxietara geratu zelako eta maiatzeko deialdian laugarren ordezkaria eskuratzea espero dutelako.
Zerrendaren lehenengo lau izenak zehazteko proposamenak jasoko dira. Ondoren, pertsona horiei, Bilduko hautagaitzan agertzeko prestutasuna galdetuko zaie eta hori adierazten duten pertsonen izenak zerrendatu eta bozkatzera deituko da.
Horren emaitzak eskuratuta eta zerrenda osatuta dagoenean, herri programaren eraketari ekingo zaio. Hori eratzeko, herrira zabaldutako bilerak gauzatuko dira prozesua zehaztu, proposamenak jaso eta hauek bozkatzeko.
Urriaren 24ko asanbladan erabaki zen bezala, Artziniegako herritar guztiek parte hartzeko aukera zabaldu da, horrela, izenak proposatzeko lau bide zabaldu dira, Bilduko egoitzan dagoen postontzian, Facebookeko orriaren bidez, haien posta elektronikoaren bidez edo Correoseko postontziaren bitartez.
Horretarako, aurreko ostiralean Artziniegako etxeetan prozesua azaltzen eta parte hartzera deitzen duen eskutitza jaso da. Azaroaren 14rarte izenak jasotzeko epea zabalik dago, horiek jaso eta gero, proposatutako pertsonei galdetuko zaie eta bozkatzeko eguna zehaztuko da. Egun horretan, Artziniegako EH Bilduren zerrendako lehen lau hautagaiak ezagutzera emango direla aurreratu dute.