Artziniegako ultrafondista maiatzaren amaieran Gobi March lasterketara joango da. Jordaniako basamortuan datorren astean egitekoa zen proba bertan behera geratu da segurtasun-arrazoiengatik.
Hiru aldiz Marokoko Saharan egiten den Marathon des Sables proba gogorrean parte hartu -eta bukatu- ostean, Artziniegako Carlos Gutiérrez ultrafondistak kirol-erronka berri bati ekingo dio laster: Four Deserts Race izeneko zirkuitua. Munduko lau basamortutan egindako lau lasterketez osatuta dago -Sahara, Gobi, Atacama eta Antartika- Azken hilabeteotan proiektu berri honetarako dirua eta baliabideak eskuratzen ibili da.
Zirkuitua bi urtean behin egiten da eta martxoaren 8an hastekoa zen Jordaniako basamortuan. Baina inguru horretan dagoen ezegonkortasun politikoa dela eta, eta kontuan izanda AEBko empresa batek antolatutako nazioarteko proba dela, antolatzaileek erabaki dute lasterketa bertan behera uztea, segurtasun-arrazoiengatik.
Hortaz, proba hori 2016an jokatuko da, dena ondo bidean, eta aurtengo lehenengo lasterketa Gobi March izango da. Txinako mugen barruan egingo da maiatzaren 31tik aurrera, eta han izango da Carlos irteera-puntuan.
Aiaraldea.eus-i adierazi dionez, azken orduko aldaketa horrek apur bat aldebrestu dizkio planak, lasterketa bera ere oso ezberdina delako, baina dena moldatzea lortu du (entrenamenduak, opor-egunak…) hegaldia hartu eta Txinara joan ahal izateko.