Denboraren makina batean sartu eta Erdi Arora bete-betean jauzi egingo du datorren irailaren 20an Artziniegara bertaratzen den orok. Errementariak, malabaristak, zaldunak, gorteko kideen desfilea... ugariak izango dira Antzinako Azokaren XVII. edizioa girotuko duten elementuak. Baina egongo dira baita erakutsi baino ezkutatu egingo diren beste elementu batzuk ere: estolderia, farolak eta antzeko azpiegitura modernoak estali egingo dira, denboran atzerako bidaia are errealistagoa egiteko.
Hainbat eskutatik pasa da azoka antolatzearen ardura. Etnografia Museoak jarri zuen martxan lehenbiziko aldiz, herriaren fundazioaren 500. urteurrena ospatzeko ekimen gisa. Hala, lehen hiru urteetan Museoaren esku geratu zen antolaketa. Ondoren, Bolaretxe koadrilako kideek hartu zuten lekukoa, eta eurak izan dira azoka antolatzen urte gehien aritu direnak. Duela bost urte udalak hartu zuen antolaketaren ardura. Handik bi urtera, baina, azoka antolatzeari utziko ziola iragarri zuen.
Gauzak hala, herriko ostalariak batu eta ekimena euren artean aurrera eramatea adostu zuten. Esan eta egin: aurtengoa ostalariek antolatutako hirugarren edizioa izango da.
Bisitari kopuruari dagokionez, aurreko urteetako markari eustea espero dutela adierazi du antolakuntzan dabilen Marta Gomezek: 10.000-12.000 pertsona inguru bertaratzea dute aurreikusia, “Bizkaia eta Gipuzkoa inguruko jendea batik bat”. “Egun horretan auto-ilara egon ohi da herrian sartzeko”, ziurtatu du azokan parte hartzen duen Gines Lopezek. Gomezek, bere aldetik, Artziniegako Azokak duen ospe ona azpimarratu du, “beste azoka batzuetan asko aipatzen dute”.
Herriaren parte-hartze aktiboa
Azoka sortu zenetik dabil Lopez bertan parte hartzen. Urtero bezala, aurten ere umeentzako ganadu feria bat antolatuko du, mota askotako animaliekin.
Ez da, baina, azokan parte hartuko duen herritar bakarra izango. Artziniegako elkarte zein norbanako ugarik euren ekarpena egingo baitute azokan: Builaka perkusio taldeak kalejira antolatuko du, herriko 20 ekoizle eta taldek postua jarriko dute... “Beste leku batzuetan enpresak kontratatzen dituzte halako azokak antolatzeko, baina hemen herriak antolatzen du”, azaldu du Lopezek. Gomezek ere “jendearen batasuna eta armonia” nabarmendu ditu azokatik, “jendeak musutruk hartzen du parte”.
Egitaraua goizean goiz hasi eta eguerdi arratsalde partean bukatuko da. Hala ere, giroa gauera arte luzatu daitekeela ziurtatu du Lopezek, eta aiaraldeko gainontzeko txokoetako herritarrei bertaratzeko gonbita luzatu die; “esaera zaharrak dioen bezala, irudi batek mila hitz baino gehiago balio duelako”.