JONATHAN CAMARA (Artziniega, 1981) futbol aretoko jokalari profesionala da eta aurreko denboraldian Liga eta Kopa irabazi zituen Ingalaterran. Aurten lorpen horiek bete ez ezik, Europako talde onenen artean egotea dute xede.
Aurten txapeldun bikoitza izan zara Ingalaterran, zein da zure ibilbidea bertan?
Pasa den denboraldian heldu nintzen Baku United-era eta egia esanda ez nuen uste hemen bukatuko nuenik. Nire ordezkariarekin hitz egin nuen eta esan nion klub aldaketa egin nahi nuela zerbait interesgarria ateraz gero. Hemengo entrenatzailea espainiarra da eta ezagutzen ninduen, joateko aukera agertu zen eta hemen nago.
Mailari dagokionez, egia esanda liga espainiarra munduan dagoen onena da zentzu guztietan: jokoa, azpiegitura, antolakuntza... hortaz kanpora joaten zarenean jokatzera maila jaisten da.
Nolakoa izan da kultura aldaketa?
Aitortu behar dut hasieran gogorra izan zela hizkuntzaren kontua baina talka kulturala handia da. London hiri ikusgarria da beraz hizkuntzarekin moldatzen hasten zarenean berehala egokitzen zara.
Hemen eramaten dudan bizitza, profesional gisa, estatu espainiarrean nuenaren antzekoa da, beraz ez da asko aldatu. Hala ere ondo hausnartu beharreko erabakia da. Urteak eman ditut etxetik kanpo baina inoiz ez nuen jokatu atzerrian. Gauza berria izan da niretzat eta nire neskalaguna ere hemen dago nirekin. Ez zen erabaki erraza izan.
Zeintzuk dira helburuak denboraldi honetarako?
Liga eta Kopa berriro irabazteaz gain helburua da Europako 16 talde onenen artean egotea. Horretarako bi aste eman ditugu dagoeneko aurre denboraldian eta beste hiru ditugu UEFA Futsal (Champions League) txapelketaren lehenengo kanporaketa prestatzeko.
Sarajevora joango gara jokatzera beraz aste zailak izango ditugu kirol esparruaren aldetik.
Ohikoa da euskal jokalariak kanpoan jokatzea?
Tamalez ez da oso arrunta. Areto futbolari dagokionez uste dut bakarrik gaudela bi hortik.
Ingalaterrara heldu baino lehen ibilbide luzea egin duzu, ezta?
Profesional gisa 12 denboraldi dira dagoeneko. Lehenengo lauak GSI Bilbon jokatzeko zortea izan nuen eta gero Euskaditik kanpo joan nintzen. Saloura joan nintzen urte batez, Castellonera beste bat, Leonera beste bat eta Tuterara hiru. Eta Londonen bigarren urtea egingo dut.
Zein dira zure ezaugarriak jokalari gisa eta zein dira zure oroitzapen gozoenak?
Inoiz ez dut gogoko izan nire burua jokalari gisa definitzea, baina esango dut langilea eta profesionala izaten saiatzen naizela egiten ditudan gauzetan.
Une gozo ugari asko ditut baina baten bat hautatu beharko banu bi igoerak eta lehen mailako debuta aipatuko nituzke. Eta Espainiako Koparako sailkapena lortu genuenean ere azpimarratuko nuke, Barçari irabaziz eta gure jendearekin Tuteran.
Zerk suposatzen dut futbol aretoko jokalari profesionala izatea futbol 11-k gainontzeko kirolak eklipsatzen duen leku batean?
Gauza askori uko egin behar diezu. Adibidez, zure herrian eta zure jendearekin egoteari. Bestalde kirolean oinarritutako bizitza egin behar duzu, asko zainduz eta profesionala izanez. Eta ez dugu ahaztu behar futbol 11-k hedabideen eta arreta ekonomiko guztia erakartzen duela.
Zer uste duzu dela beharrezko jokalari profesionala izateko?
Gehienbat egunero ahalik eta gogorren lan egitea eta batzuetan beharrezkoa den zorte on apur bat hori izatea heltzeko.
Pasa den urtean jokatutako UEFA Futsal kanporaketan gola sartu zuen Jonathanek:
[video:https://www.youtube.com/watch?v=UcnsoZoHnUk width:360 height:250]