Segurtasun Sailak jakinarazi duenez, erasoa 03:15ean gertatu da Artziniegako Garai plazan Kutxabank entitateak duen bulegoaren aurka. Zabaldutako informazioaren arabera, erasotzaileek gasolinaz busti dute kutxazaina eta bulegoaren atea, molotov koktel batekin su emateko ondoren. Ematen duenez bulegoaren barrualdeak ez du su hartu. Kutxazaina eta bulegoaren kanpoaldea belztuta geratu dira erasoaren ondorioz eta jakinarazi dutenez kutxazaina hondatu egin da.
Europa Press agentziak jakinarazi duenez bulegoan margoketa ere egin omen dute erasotzaileek "herriarekin ez da jolasten" leloarekin.
Artziniegako herritarrek aiaraldea.com-i jakinarazi diotenez, goizaldean suhiltzaileak eta Ertzaintza gerturatu dira gertakarien lekura eta sua oraindik ere piztuta bazegoen ere, berehala itzali dute. Oraindik ere gertakaria ikertzen ari da polizia.
Erasoa Kutxabank-en kapital pribatua sartzeko prozesuaren testuinguruan gertatu da, hainbat eragile sozial kutxa publikoaren "pribatizazioa eta lapurreta" salatzen ari diren momentuan.
Itxaso Atutxaren adierazpenak
Bizkaiko Buru Batzarraren lehendakariak, Itxaso Atutxa, salatu du kutxazain eta egoitzaren aurkako erasoa eta ezker abertzaleari leporatu dio, nolabait, ekintzaren ardura. Atutxaren aburuz pribatizazioaren inguruko zehatza ez den informazioa zabaltzen ari da ezker abertzalea eta horrek jeltzalearen aburuz, "alarma sortu du".
Sorturen erantzuna
Sortuk oharra zabaldu du eta erasoak PP, PSE eta EAJri mesedea egiten diola esan du. Gainera, alderdi horiei eskatu die eztabaida ez desbideratzea eta Kutxabanken pribatizazioaren inguruan mintzatzea.
Bukatzeko, Sortuk gezurrik ez esatea eskatu dio Itxaso Atutxari.