Artziniega Museoa ospakizunetan murgilduta dago, bere 30. urteurrenaren astean. Ostiral honetan, martxoak 28, Juan Jose Ibarretxe lehendakariak, Ramon Rabanera Arabako Aldun nagusi ohia eta Imanol Aretxabala Artziniegako alkate ohia kulturaren inguruan mintzatuko dira Julio Herrero, Arabako Foru Aldundiko arkitektoak gidatuko duen mahai inguruan. Gainera, igandean, martxoak 30, museoa dohainik zabalduko da eta libre bisitatzeko aukera egongo da. Baina, atzo, martxoak 25, urteurrenaren egunean, kultur arloko hainbat zuzendariren bisita jaso zen Artziniegan.
Arabako Foru Aldundiaren nahiz Eusko Jaurlaritzaren kultur eta ondareko hainbat zuzendari, Artziniega Museora bertaratu ziren udalbatzako kide batzuekin batera. Museoa ikusi ondoren, egoitzaren areto nagusian bildu ziren kargu bakoitzak bisitan jasotako inpresioak hitzaldi bezala zabaltzeko. Etorritako zuzendarien artean, Imanol Agote Eusko Jaurlaritzako Ogasun zuzendaria eta Cuca Gutierrez Arabako Foru Aldundiko kultur zuzendaria aurki daitezke.
Agurtzane Llano Artziniegako alkatesak hiru instituzioen laguntzeko konpromisoari egin zion deiari erantzuten, Imanol Agotek, Artziniega Museoarekin Eusko Jaurlaritzak egonkortasunez elkarlanean arituko dela adierazi zuen. Horrekin batera, Euskal Herriko gainontzeko museo etnografikoekin loturak sendotzera bultzatu zuen, etnografiaren garrantzian goraipatu zuen. Hala ere gauza bat argi utzi zuen Agotek: “Etnografia ez da iraganean gelditu behar”. Horrela, etorkizuneko jendea etnografiarekin bat egiten jarraituko duela uste du, Artziniega Museoa 30 urte gehiago iraun dezan.