Maider Iglesias Aranzadi Elkarteko kideak idatzitako testua:
Artziniegako udalak zientzia ume eta gazteei hurbiltzeko eta erakusteko jardunaldiak antolatu ditu. Pasa den asteburuan hasi ziren astronomia tailer batekin eta ekaina osoan zehar luzatuko dira.
Sumendien erupzioa
Jardunaldiek askotariko ekimenen bitartez adin desberdineko ume eta gazteen parte hartzea sustatzea dute helburu. Zientziaren arlo desberdinak jorratuko dira. Geologia izango da garatuko den arlo horietariko bat. Sumendi erupzio bat birsortu edota ur eta karbono dioxidoaren ezaugarriak ezagutzeko aukera edukiko dute gazteek. Biologiarentzako lekua ere izango da jardunaldi hauetan. Zelularen eta DNAaren eginkizunak azalduko dira eta “blandiblua” prestatuko da ere. Tailer hauekin guztiekin gainera, laborategiko lana nola egin eta zientzia aurrera eramateko beharrezkoak diren tresnak ere irakatsiko zaie 3 eta 15 urte bitarteko gazteei.
Sua eta ehiza
Baina ez hori bakarrik. Historiaurreko tailerra ere egingo da. Horretan gure arbasoek sua egiteko eta ehizatzeko erabiltzen zituzten tresnak eraikitzen eta erabiltzen irakatsiko zaie hurbiltzen diren guztiei.
Bukatzeko, familia osoarentzako jarduerak ere antolatu dira. Espezie exotiko inbaditzaileak eta hauek ekosistemetan sortarazten dituzten arazoak azalduko dira hitzaldi batean. Horrez gain, Aranzadi Zientzia Elkarteak suge eta sugegorriek jasaten duten ez bidezko jazarpena salatuko dute. Narrasti hauek jendeari gehiago hurbiltzeko helburuarekin gainera, hitzaldian azaldutakoa zuzenean ikusteko aukera egongo da hurrengo eguneko mendi irteeran.
Erakusketa
Tailer eta hitzaldiak Artziniegako Etnografia museoan izango dira. Bertan, gainera,“Gure historiako emakume zientzialariak” argazki erakusketa ere izango da maiatzaren 20tik ekainaren 29 bitartean.
Maiatzaren 30an izango da hurrengo ekintza Artzeniegako liburutegian: “Liburua edo ebook-a irakurtzeko plazera”.