Legebiltzarkideek bertatik bertara ezagutuko dute Museoa eta bere egoera, Artea Etnografia Elkarteak luzatutako gonbiteari erantzunez. Arabako Bilduk museoko arduradunen agerraldia eskatu du Biltzar Nagusietan.
Artziniega Museoak udalaren dekretuaren ondorioz bizi duen egoera udalerriaren mugak gainditu ditu eta beste erakundeetara ari da zabaltzen. Hala, gaur bertan arratsaldeko bostetan Eusko Legebiltzarreko Kultura Batzordeko kideak Artziniegara etorriko dira Museoa bertatik bertara ezagutzeko, Artea Elkarteak batzordeari egin zion gonbiteari erantzunez. Horretaz gain, Arteak agerraldia eskatu du batzorde horretan bertan, azken urteotan Museoan egindako lanaren berri emateko eta diru-iturri nagusiaren murrizketak bere funtzionamenduan izan ditzakeen ondorioak azaltze aldera.
Bestalde, Biltzar Nagusietako Bildu taldeak, Artea elkartearen agerraldia eskatu du, “museoan azken 30 urteotan egin duten lana azaldu dezan”. Gogorarazi dute, gainera, udalak egindako murrizketari Aldundiko Kultura Sailak egindakoa gehitu behar zaiola; izan ere, Iciar Lamarainek zuzentzen duen sailak 8.740 eurotik 5.960 eurora gutxitu du museorako bideratutako partida.
Lorena López de Lacalle Bilduko biltzarkideak adierazi du Artziniega Museoa “jarraitzeko eredua” dela, “behetik jaiotzen den egitasmoa baita. 30 urte daramatzate lanean eta herri guztiak parte hartzen du”. Bilduren ustez, “horrelako egitasmoaren arrakasta zenbakietan neurtu behar ez den arren, azken urtean 11.000 bisita izateak ere babesten du erakunde publikoetatik horrelako proiektuan egin beharreko apustua”. Hori dela eta, kolaborazio instituzionala aldarrikatu dute arazoa konpontzeko. Museora bisita bat egiteko ere eskatuko dute.