Atzo onartu ziren Artziniegako Udalaren 2017rako aurrekontuak. EAJ-PNVk alde bozkatu zuen eta EH Bildu eta PPk, aldiz, kontra. Botoetan berdinketa bat eman zenez, Iñigo Gomez alkatearen kalitatezko botoaren bidez onartu ziren aurrekontuak.
Gauzak hala, 1.810.814,13 eurokoa izango da aurtengo aurrekontua, iaz baino % 4,64 gehiago. Igoera hori eman da aurten Fofelek (Tokiko Erakundeen Finantzaketa Funtsaren Kutxak) diru gehiago emango diolako udalari.
Inbertsioetan % 60ko igoera
Udaletik jakinarazi dute 170.188 euro bideratuko direla inbertsioetara, iazko aurrekontuan aurreikusitakoa baino % 60,69 gehiago. Ondorengo obretan inbertituko da: Barcena auzoko aparkalekuan, bus geltokiko gunearen hobekuntzan eta igerilekuen arazketa sistemaren hobekuntzarako proiektuan. Auzoetan ere hainbat obra egitea aurreikusi du udalak. Argiteria berrituko da eta proiektua egingo da Barratxiko bidea birbaloratzeko.
Oposizioaren kritikak
EH Bildu eta PPk hainbat kritika helarazi dizkiote EAJren udal-gobernuari. EH Bilduko zinegotzia den Arkaitz San Josek salatu du Iñigo Gomez alkateak ez ziola hitza hartzen utzi aurrekontuak azaltzeko eginiko bileran, zinegotzia zela argudiatuta. “Zinegotziak izango gara, baina horrek ez digu hiritar gisa ditugun eskubideak kentzen”, adierazi du San Josek. Iñigo Gomezek erantzun dio esanez zinegotziek parte hartzeko badaudela “beste foro batzuk”, eta bilera horren helburua ez zela pleno bat egitea.
Aurrekontuen harira, EH Bilduko zinegotziak azaldu du “zerbitzuetan zementuan baino gehiago” inbertitu beharko litzatekeela. “Horretara egon dira bideratuak gure ekarpen guztiak”, zehaztu du. San Josek gaineratu du aurrekontuei begira egin den prozesua ez dela parte hartzailea izan. “Aurpegia garbitzeko propaganda ekintza bat izan da”, kritikatu du zinegotziak, eta azpimarratu du beste modu batean lan egin behar dela “hiritargo ahaldundu bat” lortu nahi bada. “Arimarik gabeko aurrekontua da. Kudeatzaile huts izatera mugatu zarete”, esan die EH Bilduko zinegotziak gobernu-taldeko kideei.
Alderdi Popularrarentzat, aldiz, aurtengo aurrekontuak “iazkoen kopia txar bat” baino ez dira. Joseba Elejalde zinegotziak adierazi du aurrekontuaren gehiengoa ohiko gastuetara bideratzen dela, “inbertsioetarako % 9 baino ez utziaz”. Hortaz gain, Elejaldek azaldu du ez direla kontuan hartu berak eginiko emendakin batzuk. Besteak beste, Aiaraldea Komunikazio Leihoak jasotzen duen diru-laguntza kentzea proposatu du PPren zinegotziak, inpartziala ez izatea egotzita. Museo Etnografikoari ematen zaion laguntza ere kentzea eskatu du, “Eusko Jaurlaritzak zenbat diru emango duen zehaztu arte”. Kiroldegiari dagokionez, udalbatzan zehaztutako tasak aplikatzea eskatu du PPko zinegotziak.
Iñigo Gomez alkateak kritika horiei erantzun zien esanez udal talde guztiek izan dutela aurrekontuei ekarpenak egiteko tartea, eta EH Bilduren zein PPren proposamenetako batzuk aurrekontuan txertatu direla. “Ekarpen garrantzitsuenak kontua eduki ditugu”, adierazi du alkateak, “lan egiten gabiltza, gogotsu eta erabakitasunez, gustatu edo ez”.