Aiaramendi trail taldeko Aritz Iturribarria gailendu da Arabako Mendi Lasterketen III. Kopan. Urriaren 22an jokatu zen kopako azken lasterketa Legution.
Jarindo Albertia mendi lasterketarekin eman zioten amaiera norgehiagokari. Bost lasterketa izan dira guztira: Araiako Mitxarro bira, Egileta-Dulantzi mendi maratoi erdia, Amurrio Trail Lasterketa, Peregañako igoera eta Legutioko Jarino Albertia mendi lasterketa.
Artziniegako kirolariak, arazo fisikoak tarteko, denboraldi gorabeheratsua izan du. Legutioko mendi lasterketan lortutako 5. postuak Arabako kopan gailentzera eraman du, orotara 1.187 puntu eskuratuta.
Urtarrilean indartsu hasi zuen Iturribarriak denboraldia. Uda aurretik 10 lasterketa baino gehiagotan parte hartu zuen eta emaitza onak lortu. Ekainera, ordea, ahul iritsi eta Peregañako igoeran lasterka ibili gabe atseden hartzera behartua ikusi zuen bere burua.
Pozik egoteko moduko urtea
Irailean ekin zizkion berriz entrenamenduei. Urria eta abendua bitarteko lasterketak laburragoak eta azkarragoak izan ohi dira. Eragozpen fisikoak medio hiru lasterketatan lehiatu da bakarrik, tartean Arabako Mendi Lasterketen III. Kopa irabazi du.
Aritz Iturribarriak ez du, ordea, denboraldia amaitutzat eman; abendua bitarte proba gehiagotan korrika egitea espero du.
Pozik egoteko moduko urtea bizi izan du Iturribarriak. Hurrengo denboraldian asko pentsatu ez badu ere, urtarrilean asfaltoko lasterketa bat ondo prestatzea gustatuko litzaioke.