Bidexken egoera izan zen otsaileko Udal Osoko Bilkurako eztabaidagaietako bat. Ostegunean izan zen udalbatza, eta Joseba Elejalde PPko zinegotziak errepideen egoerarekiko kezka plazaratu zuen: "Hainbat tokitan dago lokatza edo ura, bidexketan batez ere". Erretesen lurra konpontzeko obrak egin dituzte, eta emaitzaren gabeziak mahaigaineratu zituen zinegotziak, zorua hainbat gunetan ez baita lau geratu. Iñigo Gomez alkateak lanen xehetasunak eman zituen, bideen konponketari heltzea "beharrezkotzat" joz.
Peñalbarako bidea
"Peñalbarako bidea plano zahar guztietan dago, eta udaleko katastroan ez", salatu zuen Elejaldek. "Urtero eskatzen ditut 25.000 euro aurrekontuetan Artziniegako bideen inbentarioa egiteko", azpimarratu zuen. Ildo beretik, Peñalbarako pista aipatu zuen, jende ugarik erabiltzen baitu: "Pista udalarena ez denez, ez du instituzioak konpontzen. Zein da erremedioa, finka pribatua denez, jabeak bidea ixtea?".
Elejalderen iritziz, Erretesen badira 5-6 bide publiko erregistratu gabe. "Horren ondorioa da berauek hobetzeko laguntzak ezin eskatzea". Alkateak aferari heltzeko konpromisoa agertu zuen, "beharrezkoa" dela iritzita. Egun, bide nagusiak ditu jasota administrazioak, "baina bigarren mailakoak ez".
Zuhaitz erorketak
EH Bilduk, bestalde, eskola inguruko jolasparkearen aferari heltzeko beharra aipatu zuen. Joseba Vivancoren arabera, haizeteek segurtasun eza eragiten dute: "Parkingaren aldameneko 2 zuhaitz jauzi dira. Udalak ezer erabaki aurretik, Guraso elkartearekin biltzea proposatzen dugu". Era horretan nahi dute adostea hartu beharreko neurri oro.
