Erretes Tudelako sarbidearen egoera izan zen eztabaidagai asteleheneko osoko bilkuran. Joseba Elejaldek aurkeztu zuen mozioa, PPren izenean. Izan ere, bi hilabete baino gehiago daramatza bideak egoera "arriskutsuan". "Arabako Foru Aldundiak egin duen bakarra argidun kono batzuk jartzea da".
EH Bilduk bat egin zuen kezkarekin, eta errepidearen egoera teknikoari buruz galdetu zion alkateari. Iñigo Gomez alkatearen esanetan, Arabako Foru Aldundiarena da errepidea. Ondorioz, hari dagokio mantenua, baita konpontzea ere. "Ekainaren hasieran eman genion arazoaren berri Diputazioari, argazki eta guzti. Kalteak aztertuko zituztela esan ziguten, baina eguraldi txarragatik ezingo ziotela berehala erantzun eskaerari".
Segurtasun aldetik ez dago arazorik Arabako Foru Aldundiaren ustez. "Espero dugu konponketa lanak ahalik eta lasterren egitea, aste honetan edo hurrengoan", erantsi du alkateak.
PPren iritziz, ordea, ezin da gertatu hilabete atzeratzea lanak eguraldi txarragatik: "Sekulako euriteak egon direnean beste hainbat errepide oso arin konpondu dituzte. Ezin dugu itxoin denbora, dirua edo gogoa izan arte; are, auzo bateko sarbidea bada". Gobernu taldeak jarraipena egiteko konpromisoa hartu zuen, "diputazioaren eskumena da eta". EH Bilduk babestu egin zuen PPren mozioa, eta EAJ abstenitu egin zen.
