Otsati elkarteko kuadrillen arteko txapelketa antolatu du, beste urte batez. Zazpi ekintza puntuagarriak zehaztu dituzte: kulero eta galtzontzilo lasterketa, pintxo txapelketa, bonbona lasterketa, playback lehiaketa, "iturritik iturrira" proba, arrautzopil txapelketa eta herri kirolak.
Kulero eta galtzontzilo lasterketari dagokionez, bi kategoria egonik, emaitzarik onena soilik hartuko da kontuan: "Puntuazio berdina eskuratzen bada, zozketaz aukeratuko da". Pintxo eta arrautzopil txapelketetako kopuru muga ere zehaztu dute, gehienez hiru aurkeztu ahalko dira. Bonbona lasterketan, berriz, sailkapen orokor mistoa hartuko da aintzat. Horrez gain, azpimarratu dutenez,"Iturritik iturrira" proban mozorroak soilik baloratuko dira.
Ekintza bakoitzean lehen postua lortzen duen lagun taldeak 10 puntu eskuratuko ditu, bigarrenak 9, hirugarrenak 8, laugarrenak 7 eta abar. "Aurkezten ez den ekintza bakoitzeko kuadrilla bakoitzari bere puntuazio orokorretik 3 puntu kenduko zaizkio", ohartarazi dute. Izen-ematean aipatu beharko dute txapelketa bikoitzean ari direla parte hartzen.