Zuriñe Frutos artziniegarrak bi garaipen erdietsi ditu asteburuan. Batetik, Zeanuriko duatloia; eta, bestetik, Seranteseko igoera.
Larunbatean izan zen Arratiako proba. "Lehen postua lortu nuen, eta Euskadiko txapeldunarena. Honekin, dagoeneko, hiru lasterketa jarraian daramatzat irabazten", adierazi du.
Dena den, gogorra izan zitzaion Zeanuriko proba: "Oraingoan konpetentzia handia izan dut, gehiago ahalegindu behar izan naiz, sufritzea egokituko zait". Borroka bizia egin behar izan zuen Frutosek, baina garaipenak zapore hobea uzten diola horrelakoetan dio. Azken txanpan lortu zuen irabazteko tartea ateratzea.
Biharamunean, berriz, Santurtziko Serantes igoeran hartu zuen parte, 12,5 kilometroko mendi lasterketan. "Iaz oso ondo pasatu nuen, eta ez nuen aurten hutsik egin nahi".
Nekea dela eta, bi minutu gehiago behar izan zituen bukatzeko: "Igoeran bigarren nindoan. Jaisterakoan jarri nintzen lehenbiziko postuan. Helmugara iritsi arte ez nion korrika egiteari utzi".
Saria baino, giroa nabarmendu du Frutosek: "Sekulakoa da helmugara iristea Santurtzin, azken metroetan kale osoa dago jendez beteta eta animatzeko oihuka. Ileak puntan jarri zizkidaten. Eskerrik asko Mamariga, zer nolako zalegoa!".
Oharra: Eduki hau bazkideei esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitu.