Artziniegak badu proiektu komunikatibo berria: Otsati Uhinak irrati librea. Otsati Kultur Elkarteko kideek sortu dute proiektua. “Kide batek proposatu zuen, bozkatu genuen eta baiezkoa izan zen nagusi”, azaldu dute ekimenaren sustatzaileek. Set txiki bat atondu dute elkartearen egoitzan, irratsaioak grabatzeko, eta internet bidez plazaratuko dituzte gero, YouTubeko kanal batean.
Momentuz bi programa grabatuko dituzte, hamabostean behin. Gaurkotasuna izango du ardatz batak, eta historia, aldiz, besteak. “Bietan herriko jendea izango da protagonista. Horrez gain, puntualki saio bereziak egiteko asmoa dugu: Euskararen Eguna dela eta, jaietan…".
Adierazi dutenez, programa gehiago egin nahi dituzte, "martxa" hartzen dutenean. "Eta norbaitek irratsaio bat egin nahi badu, Otsati Uhinak irrati librean du horretarako aukera”. Nabarmendu dutenez, edonork parte hartu dezake egitasmoan. “Baldintza bakarra da konpromisoa izatea gure herriarekin, kulturarekin eta gaur egun ezinbestekoak diren borrokekin: justizia soziala, ingurunea, feminismoa...”.
Oharra: Eduki hau bazkideei esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitu.