Euskararen egunak ospatuko dituzte Artziniegan Euskaraldiaren azken txanpan

Erabiltzailearen aurpegia
Txapa banaketarekin eman zioten hasiera Euskaraldiari Artziniegan. / Aiaraldeko Euskalgintza Kontseilua

Artziniegako Euskararen egunak antolatuko dituzte gaur eta bihar, abenduaren 2an Laudion ospatuko den jai erraldoiaren atarian.

Bi egunetako egitaraua prestatu dute Artziniegan Euskaraldiaren azkenengo egunetarako.  Gaur goizean umeentzako jolasak eta tailerrak egingo dituzte Arteko Gure Ama herri ikastetxeko ikasleekin.

Egun osoko egitaraua
Bihar, aldiz, euskarak Artziniegako kaleetara egingo du jauzi. 13:30ean, Artziniegako Rock Elkartearen laguntzarekin, herriko tabernetatik triki-poteoa egingo dute, frontoitik abiatuta.

14:30ean 100 lagunentzako herri-bazkaria prestatuko dute Otsati elkarteko kideek. Bazkalostean euskal abestiak abestuko dituzte, horretarako abesti-liburuak banatu eta zuzeneko musika eskainiko dute Artziniegako Rock Elkarteko kideek.

17:00etan herriko gazteak euskararen bila arituko dira Artziniegako alde zaharrean barrena Gaztelekutik abiatuko den “Altxorraren bila” jolasean.

Eguna borobiltzeko dantza plaza egingo dute Patxi Perezekin frontoian, 18:00etan.

Zutabea Laudiora
Igandean, abenduak 2, Laudiora joateko deia luzatu diote Artziniegako herritar orori. Artziniegarrek Laudioko Ugarte auzoan dute zutabea osatzeko zita 10:15ean, Aiara eta Okondoko auzokideekin batera.

Oharra: Eduki hau bazkideei esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitu.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide