Hogei urte daramatza Teresa Lafraguak Santxotena museoan Munduko jaiotzak erakusketa atontzen. "Nazioarteko mota honetako erakusketa bakarra da Artziniegakoa, eta errepikaezina", aipatu du. Izan ere, 2.203 jaiotza dituzte ikusgai: "Ez da garrantzitsua kopuruagatik bakarrik, baita eszena, bildumaren antolaketa eta erakusketaren ibilbideagatik ere".
Aurtengoa 20. edizioa izango da eta Galizia izango da lurralde gonbidatua. Hala, bertako lau probintzietako lanak eskuratu dituzte: "Ogi manpurrekin, keramikarekin... osatu dituzte artisauek jaiotzak". Nobedade gisa, ikusleen artean "berariaz sortutako jaiotza bat" zozketatuko dute. Bitxikerien artean, 50 eta 100 urte dituzten jaiotzak ere badituztela dio Lafraguak. Gainera, umeentzat gune berezia atondu dute.
Lurralde ugaritako lanak ikusgai
Kolonbia, Peru, Mexiko, Guatemala, Ecuador, Kuba, Alemania, Frantzia, Norbegia, Italia, Portugal, Txile eta beste hamaika lurraldetako jaiotzak ezagutu ditzakete bisitariek. Euskal Herriko obrak ere badira, baita Estatu Espainiarrekoak ere: Kantabria, Herrialde Katalanak, Extremadura, Gaztela-Leoi, Asturias, Andaluzia, Kanariar Uharteak, Madril...
Abenduaren 24tik urtarrilaren 31 arte egongo da erakusketa zabalik, ostiraletik igandera. Ordutegiari dagokionez, goizetan 11:00etatik 14:00etara egongo da bertaratzeko parada, eta arratsaldez 16:00etatik 19:00etara.