Artziniegako Udalak diru-laguntza eskatuko dio Arabako Foru Aldundiari, Garai plaza berritzeko. Zehazki, haur gunea handitu nahi dute, autobus geltokiko hesiraino hain zuzen. Hala, zorua konponduko dute, eta egungo baliabideak hobetu.
Joseba Vivanco EH Bilduko zinegotziak azaldu duenez, ez dute egitasmoa guztiz babestuko: "Ez gaude jolas parkea handitzearen kontra, beharrezkoa da. Abstentziora joko dugu kudeatzeko moduagatik, oso azkar erabaki da, ostiralean onartu zen igandean epea bukatzen zelako. Beste modu batean egin beharko litzatekeela uste dugu".
Vivancoren esanetan, EH Bilduren asmoa plaza osoa berritzea zen, "hori proposatu genuen gure hauteskunde programan". Hain zuzen, haurren gunea handitzea proposatu zuten, baina egin aurretik pertsona eta familia erabiltzaileei galdetuta: "Hori egin izan balitz, esaterako, orain ez litzateke hesia konpondu beharko autobus geltokira baloia ez iristeko, edota are txarrago, umeak errepidera ez ateratzeko...". Erantsi duenez, parte hartzea baliatu izan balitz, ez litzateke egungo arazoa egongo. "Bistan denez, ez da aipatutako ezer egin, horregatik erabaki dugu abstenitzea. EH Bildutik parte hartzea beste modu batean ulertzen dugu".
Oharra: Eduki hau herritar eta bazkideei esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitu.