Artziniegako Bizindar sokatira taldeak kide berriak biltzeko kanpaina abiatu du. Sare sozialetan zein herriko txokoetan zabaldu dute deialdia, mezu argiarekin: "Artziniegako sokatira taldeak neska-mutilak behar ditu".
Olatz Iarrituk azaldu duenez, duela 8 urte sortu zen taldea. "Hasiera batean neskak bakarrik geunden, 13. Denborarekin, ordea, 7 geratu gara: lanagatik, amatasunagatik... jendea uzten joan da".
Egun, nesken zein mutilen taldea dute: "Aurten 4 mutil sartu dira taldean. Guztira, 5 mutil eta 5 neska gaude". Txapelketetan 8 laguneko taldeek hartzen dute parte, horregatik aritu dira orain arte 4x4 txapelketetan bakarrik. Kide berrien inkorporazioa medio, aurten lehen aldiz aurkeztu dira mutilak.
Martxoaren 9an Euskal Herriko txapelketa mistoa jokatuko da, eta bertan lehiatzea izango dute helburu: "Talde berria izango da, Ibarrako txapelketara aurkeztuko gara. 2020an Munduko Txapelketa jokatuko da Irlandan, eta aukera hori baliatu nahi dugu".
Interesa duen orori, frogatzeko gonbita luzatu diote: "Frogatu nahi izanez gero deitu edo mezu bat bidali hurrengo telefonoetara: 665751586 (Aintzane) edota 660791570 (Olatz)".
Oharra: Eduki hau herritar eta bazkideen laguntzari esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitzuen.