Artziniega Museoaren aldeko testua onartu dute Arabako Batzar Nagusietan. Alderdi Popularrak aurkeztutako mozioarekiko erdibideko zuzenketa adostu dute talde politiko guztien artean.
Bi gauza eskatu dituzte batzarkideek testuan. Alde batetik, Artea etnografia elkartearekin hitzarmena sinatzeko deia luzatu diete Arabako Foru Aldundiari, Eusko Jaurlaritzari eta Artziniegako Udalari, “Artziniega museoaren kudeaketarako, finantzaziorako eta sustatzeko, proiektuaren jarraikortasuna bermatzeari begira”.
Bestetik, Foru Aldundiari eskatu diote museora bideratzen duen 35.000 euroko diru partida mantentzea. Modu horretan bermatu nahi dute Artea etnografia elkarteak aukera izatea ondarea berreskuratzea, ikusgai mantentzen jarraitzea, bisita didaktikoak egiteko gida zerbitzua kontratatzea eta kultura tailerrak egitea; “zonaldeko informazio turistikoa ematearekin batera”.
Edonola ere, Foru Aldundiak 2 hilabeteko epea hartu du bideragarritasun plana sortzeko, nahiz eta PPk eta EH Bilduk azaldu zuten ez dela erabakia atzeratu behar. Izan ere, legealdia 3 hilabeteren buruan amaituko da.
Batzar irekia ostiralean
Museoko kideek bilera irekia deitu dute ostiral honetarako, konponbidea bilatzeko asmoz. 19:30ean izango da, museoan bertan. Artadi (orain arte gida zerbitzua eskaini duen enpresa) eta Artea etnografia elkarteko kideak bertaratuko dira. Udalari ere proposatu diote parte hartzea.
Oharra: Eduki hau herritar eta bazkideen laguntzari esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitzuen.