Asteazken arratsaldean egin zuten Artziniegan legealdi berriko lehen udalbatza. Hainbat gauza zehaztu zituzten bertan. Joseba Vivancoren soldata izan zen horietako bat. 29.000 euro gordin kobratuko ditu alkate berriak, 1.700 hileko.
Vivancok argitu du EH Bilduren zinegotziek proiektu ezberdinetara bideratu izan dutela dietetan jasotzen duten dirua: Gobernuz Kanpoko Erakunde batera, alderdi batera, elkarte batera... “Norberaren erabakia da kobratzea edo ez”.
Vivancok jakinarazi du Arkaitz San Jose izango dela gobernuaren bozeramailea eta Unai Gotxik hartuko duela alkateorde postua.
Batzordeak
Plenoen ordutegiei dagokionez, alkateak jakinarazi du goizez zein arratsaldez izango direla, baina gaineratu du hainbat aldaketa egin dituztela: Gobernu Batzordea kendu dute, “eraginkortasuna eta arrazionalizazioa” bermatzeko. EAJk Gobernu Batzordea kentzearen erabakia kritikatu du, organo hori zortzi urtez funtzionatzen egon dela eta bertan talde politiko guztiek parte hartu dutela argudiatuta. Oposizioari parte hartzea eta informazioa ukatzeko modu bat da hori, jeltzaleen aburuz.
Hala ere, udal gobernuak aurreratu du hiru batzorde informatibo izatetik bost izatera pasako direla aurrerantzean. Hor ere kritika bat plazaratu dute jeltzaleek, ordezkari banaketa “proportzionala” ez dela iritzita: batzorde horietan ordezkari bakarra izango du EAJk, hiru zinegotzi dituzten arren.
Alkateak, bere aldetik, nabarmendu du EH Bilduk hauteskundeak irabazi dituela. “Gehiengo absolutua dugu eta ez dugu horregatik barkamenik eskatuko”.