“Pertsona batek duen jarrera ez desiragarria” salatu du Artziniegako Udalak, “katuak txinbera karabina batekin ari baita erasotzen”. Hala adierazi dute oharrean. Zehazki, Artekale eta Goienkale kaleen artean jazo dira erasoak, “eta uste dugu ez dela izan hori gertatu den aldi bakarra”. Ondorioak eta kalteak bistakoak dira: “Zonalde berean agertu dira hilik zenbait animalia”. Egoeraren aurrean “gertakizun larri horien egilea” topatzeko adi egongo dira, adierazi dutenez. Isun ekonomikotik harago, tokiko erakundeak azpimarratu du udalerrian ez dituztela horrelako “portaera arbuiagarriak” onartuko.
Hirua elkartearekin batera harrapatze, antzutze eta askatze programan murgilduta dihardu Artziniegako Udalak. Lau urteko prozesuaren bidez, katuen populazioa zaindu dute: “Denbora horretan 50 animalia atzeman dira”. Populazioa saneatu eta kontrolatzeko programa lau gunetan dago martxan: Eguzkimendin, Alde Zaharrean, Barcenan eta udal pilotalekuan. “Borondatezko lanaren ondorioz, animalia horien hobekuntzan jauzi kualitatiboa nabaritu da”, adierazi dute.