Apirilaren 26an aurkeztu zuten Kepa Sojo zuzendariak gidatutako filma. Artziniegan egin zen grabaketaren zati handiena. Geroztik, makina bat zinemetan egon da ikus-entzunezkoa ikusteko aukera. Aurki, Artziniegan ere jarriko dute. Izan ere, festen baitan, emanaldia antolatu dute Goiko plazan. Irailaren 3an izango da hori, 21:00etan.
"Bi hilabetez herria plato handi bat bilakatu zen, aktore oso ezagunak etorri zirelarik", adierazi du Artziniegako EAJk sare sozialetan. Udalak maiatzaren 15ean informatu gisa, Artziniegan proiektatuko da filma irailaren 3an, erantsi dutenez. "2018ko abuztutik Gobernu taldeak sutsuki egin zuen lan pelikulako promotorearekin grabaketaren zati handiena Artziniegan egiteko. Emaitza apirilaren 26ko estreinaldian ikusi genuen". Artziniegako EAJk nabarmendu du Artziniegan proiektatuko dela filma, maiatzaren 15ean gobernuan zeudela adierazi zuten moduan. Horrez gain, Donostiako Zinemaldian ere ikusteko aukera egongo dela aurreratu dute, Sail Ofizialetik kanpo.
EH Bilduk argitu du, gogor egin dutela lan EAJren iragarpena gauzatzeko: "emanaldia jaietan izatea erabaki genuen". Joseba Vivanco alkateak sare sozialetan aipatu duenez, jeltzaleek pelikula doan utziko zietela esan zuten eta ez da hala izan: "Mila eurotik gora balioko du. EAJk argazkiak ateratzen jarraitzen duen bitartean, EH Bildun lanean segiko dugu". Zentzu horretan, Unai Gotxi zinegotziak azken asteetan egindako lana goraipatu du alkateak, "kopia lortzea ez baita erraza izan".