21. edizioa izango du aurten Artziniegako Antzinako Azokak. Ohi bezala, egun osoko egitaraua prestatu dute aurten ere. Hala, mendeetan atzera egingo du udalerriak. Kaleetako dekorazioa eta herritar zein feriako partaideen jantziak izango dira horren adierazle. Izan ere, jai egunean murgiltzeko eta aktiboki parte hartzeko deia luzatu dute udaletik. Unai Gotxi Kastresana zinegotziaren esanetan, herriko postuak berreskuratzen ahalegindu dira: "Azken urteetan jendeak parte hartzeari utzi dio, eta berriro inplikatzen saiatu gara".
Eragile ugarik egin dute bat
Eragile ugarik egin dute bat ekimenarekin. Artziniegako Museoak, esaterako, bertako piezak aterako ditu kalera, "postu oso bitxia jarriko dute, sorpresa izango da". Emanaldi berezi bat ere eskainiko dute egitarauaren barruan, mojen kontzertua: "Eliza barruan abesteko proposamena luzatu genien eta animatu egin dira". Bestalde, Lafraguaren tailerrean errementari bat egongo da lanean, duela zenbait urte nola lan egiten zuten erakutsiko dute, "tailer biziaren bitartez".
Horrez gain, abereak eta kale-animazioa ere egongo dira: "Ez dugu jarduera estatikoen alde apustu egin, bestela jendea gune berdinean pilatu egiten da eta. Horregatik, aurreko urteetan bezala ikuskizun ibiltariak edukiko ditugu; baita kontzertuak ere". Umeentzat, aldiz, tailerrak prestatuko dituzte, eta zaintza gunea atonduko dute. "Aparkalekuak hutsik izaten saiatuko gara kanpoko jendea etortzeko", erantsi du.
Herritarren parte hartzea bultzatu dute udaletik, baina kanpokoei ere luzatu diete mezua: "Euskadiko lehen antzinako azoka da Artziniega, berezia da, jendea inplikatzen dugulako. Denbora makina da, urteetan atzera egiten baitugu. Merezi du etortzeak, herria eta ingurunea oso politak direlako, animatu!".
Gogoeta fasea
"Ekainaren 15ean sartu ginen udalean, beraz, ez dugu denbora askorik izan jendea inplikatzeko; beraz, udalak hartu du bere gain azokaren kudeaketa", azaldu du zinegotziak. Hala ere, hurrengo urteei begira aldaketak aurreikusi dituzte: "4 urte daramatzagu eskatzen Antzinako Azokaren gaineko gogoeta. Aurtengo edizioa bukatzean ekingo diogu horri, datozen urteetan zer eta nola egin nahi dugun denon artean erabakitzeko".
