aiaraldea.eus

Santa Kolomako bidea berreskuratuko du ofizioz Artziniegako Udalak

Erabiltzailearen aurpegia Aitor Aspuru Saez   Politika  Artziniega

Udal Osoko Bilkuran prozesuarekin jarraitzea adostu zuen Artziniegako Udalak. Horrez gain, hainbat gai landu zuen erakundeak; elkarteen hitzarmenak, mozioak...

Santa Kolomako bidea berreskuratuko du ofizioz Artziniegako Udalak
Joseba Vivanco alkatea eta Arkaitz San Jose zinegotzia./ Aiaraldea.eus | Ikusi handiago | Argazki originala

Artziniegako Udalak aho batez onartu zuen Santa Kolomako bidea berreskuratzeko urratsekin jarraitzea. Ofizialki jakinaraziko zaie ibilbidea okupatzen duten herritarrei elementu guztiak kendu beharko dituztela eta, gainera, ez da helegitea jartzeko aukerarik egongo. Berez, erabakia publikoa egiteko azken tramitea izan zen atzokoa.

Prozedura legalekin jarraiki, 2017an egindako langile publikoen %0,6ko soldaten igoera bertan behera uztea onartu zuen tokiko erakundeak, Estatuko Abokatuak jarritako helegitearen ondorioz. Eudelen gomendioarekin bat egin arren, produktibitateari eta modernizazioari egindako igoera hori legez kanpokotzat jo dute epaitegiek.

EH Bilduk eta EAJk epaia onartzearen alde egin zuten eta PP abstenitu egin zen. Izan ere, Alderdi Popularreko zinegotziak leporatu zien beste taldeei legearen kontra egitea 2017an. Gainera, Joseba Elejalde popularrak alkateari galdetu zion zenbateko gastua suposatu duen epaiketak.



Horren ostean, aho batez babestu zuten udalerriko fibrozementuzko hodiak aldatzea ur horniketa sarean. Horretarako okupaziorako ezjabetzak gauzatu beharko ditu tokiko erakundeak. Arabako Foru Aldundiko Obra eta Zerbitzuen Planaren barruan daude lanak eta, bide batez, frontoiko aparkalekua urbanizatuko da eta Saratxagurengo aldapa asfaltatzeari ekingo diote.

Elkarteen hitzarmenak
Atzoko udal osoko bilkuran hiru elkarteren udal hitzarmenak ere landu zituzten eta hirurek aurrera egin zuten, nahiz eta PPk Aiaraldea Kooperatibaren kasuan aurka bozkatu.

Gauzak horrela, Aiaraldeko Euskalgintza Kontseiluak 250 euro jasoko ditu euskararen erabilera sustatzeagatik, Aiaraldea Kooperatiba Elkarteak 1268,40 euskarazko hedabideak bultzatzeagatik eta ASASAMek 400 euro buru osasunaren esparruan eragiteagatik.

Horiek guztiak aurrekontuetan jasota zeuden. Gurutze Gorriaren, DYAren edota Babio Guraso Elkartearen hitzarmenek prozedura bera igaro beharko dute.

Bi mozio
EH Bilduk bi mozio aurkeztu zituen atzo. Alde batetik Tafallari elkartasuna adierazteko, uztaileko uholdea dela medio. Bestetik, Aldaketa Klimatikoaren aurka neurriak hartzeko. Lehenengoak PP eta EAJren botoak izan zituen, baina biek leporatu zioten EH Bilduri bakarrik Tafalla aipatzea, Mediterraneoan antzeko arazoak izan arren irailean.



Aldaketa Klimatikoaren testuaren harira, PPk aldeko botoa eman zuen, baina EAJk kontrakoa erabaki zuen. Izan ere, testuak adierazten du Eusko Jaurlaritzako 2020-2030 plana ez dela nahikoa.

Hori guztia ez ezik, Joseba Vivanco eta Arkaitz San Jose Artziniegako Kantauriko Urkidetzan ordezkariak izatea eta Unai Gotxi ordezko izendatzea erabaki zuten.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa