Joseba Vivanco: "Valleren finkako etxolaren eraispena ez egitea prebarikazioa izango litzateke"

Botako den etxolaren argazkia. / Artziniegako Udala

Joseba Vivanco alkateak esan du udalak Valleren finkako etxola botatzea beste erremeriorik ez duela, eraispena gelditzea bilatzen duen sinadura-bilketari erantzuna emanez. Nabarmendu duenez, alkate bezala "prebarikazio" delitua egitea izango litzateke etxola ez eraistea, epai irmoa delako.

Artziniegako alkateak, Joseba Vivancok, Valleren finkako etxolaren eraispena gelditzea bilatzen duen sinadura-bilketa dela medio, “epai finko” bat dela eta udala hori gauzatzera behartuta dagoela esan du. Eraispena gelditzeko Udalaren partetik edozein jokabide gauzatzea “prebarikazio” delitua izango litzatekeela argitzen du alkateak ohar batean.

Etxola horren afera luzea da: 2008an Udalak eraikuntza erreabilitatzeko lizentzia bat eman zuen. Baina handik bost urtera herritar batek salaketa jarri zuen, egindako moldaketak, erreabilitazioa izan ordez, "eraikuntza berria” sortu zutela argudiatuta.

Ondorioz, garaiko alkateak etxola botatzeko dekretua eman zuen 2015ean eta eraikinaren jabeak helegitea jarri zuen. Aurten, irailaren 25ean, beste bi errekurtso tartean zirela, Euskadiko Justizia Auzitegi Nagusiak eraikuntzaren eraispena dekretatu zuen, beste edozein baliabide legal bertan behera utzita.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide