Argindarrik gabe geratu dira Artziniegako hainbat zonaldetan. Argia hainbat aldiz joan da arratsaldean udalerriko zenbait puntutan eta gauarekin batera, orokortu egin da argi gabezia, lekukoek Aiaraldea hedabideari jakinarazi diotenez. Iturri berek ziurtatu dute 05:00ak arte ez duela konpondu Iberdrolak matxuraren zatirik handiena. Hala ere, Garai Etorbideko eta Geltoki Plazako etxeak argirik gabe esnatu dira. Iberdrola eguerdian ekin dio gune horietan argindarra berrezartzeari, udalak jakinarazi duenez.
Antza, haizeteek eragin dute elektroindar mozketa. Ez da eguraldiak sortutako lehen arazoa izan: Arratsaldean Barrenkale kalearen espaloi bat hesitu dute, leihoetatik kristalak erortzen hasi direlako. Izan ere, haizetea dela eta, hainbat leiho hautsi dira eta, arriskuak saihesteko, zonalde hori mozteko erabakia hartu du udalak.
Horrez gain, udaletxearen aurrean zegoen artea erori da haizearen eraginez. Santa Kolomako bidean ere zuhaitz bat erori da errepidean, bizilagunek jakinarazi dutenez.
Menagaraiko sarrera ere moztuta geratu da, Artziniegako noranzkoan, eta hainbat langile bertaratu dira egoera bideratzeko.
Bestalde, Aiara Txirrindularitza Elkarteak igandeko ziklo kros lasterketarako prestatutako ibilbidea ere kaltetu du haizeak. Hala ere, taldeak jakinarazi du dena prest egongo dela iganderako.