Atzo 8:30ean ez-ohiko udal osoko bilkura egin zuten Artziniegan eta jorratutako gai nagusia igerilekuen berritze obra izan zen. Berez, inbertsio garrantzitsua egikarituko dute bertan eta, guztira, 364.196,12 euro gastatuko dituzte.
Alkateak atzo azaldu zuen Galitec Desarrollos Tecnológicos enpresari eman diotela ardura, besteak beste, obraren epea 5 hilabetera murriztu duelako. Zentzu horretan, Joseba Vivancok honakoa adierazi zion Aiaraldea Hedabideari: "berehala hasi behar dira lanak, ekainean igerilekua ireki ahal izateko".
Berez, igerilekuaren ontzia (1,10 eta 1,70 metroko altuera izateko) eta hondartza berritzeaz gain, araztegia lekuz aldatuko dute eta gatza erabiltzen duen klorazio sistema jarriko dute.
Bermea bost urtera luzatu du enpresak eta, gainera, Arabako Eraikuntzako Lan Hitzarmena betetzen du, behin betiko kontratua duten 10 langile ditu eta ez du azpikontrataziorik aurreikusi.
EH Bilduk eta EAJk babestu zuten erabakia aho batez. PPko zinegotziak ez zuen udalbatzan parte hartu.
Santa Kolomako bideak
Artziniegako Udalak azken urratsa eman zuen atzo ere Santa Kolomako zenbait bide publiko berreskuratzeko. Onartutako akordioa dela eta, erakundeak hilabetea emango die bideak okupatzen dituzten herritarrei elementu guztiak kentzeko.
Epe horren barruan ez balute egingo, udalak berak egingo ditu erretiratze lanak eta gastuak herritarrei kobratuko dizkie.
Pentsioak hizpide
Bukatzeko, pentsioak ardatz zituzten bi mozio onartu zituzten. Lehenengoa Arabako Pentsionistak Lanean kolektiboaren testua zen eta EH Bilduk aurkeztu zuen, pentsio duinak aldarrikatzeko. Bigarrenean, EAJk aldarrikatu zuen eskumen hori -pentsioena- Eusko Jaurlaritzaren eskuetan geratzea, Gernikako Autonomia Estatutua beteta.