Gabonetako oporrak bizikletarekin betetzeari ekin zioten atzo Artziniegan. Alde batetik, goizean hitzordua izan zuten txirrindulazaleek errepidera ateratzeko. Bi ibilbide bete zituzten: herriko frontoitik Sojora edo Sojogutira, norberaren gogoen arabera.
Arratsaldez, ordea, emakumezkoen txirrindularitzak hartu zuen Etnografia Museoa, 19:30etatik aurrera. Eider Merino Movistar Teameko txirrindulari profesionalak, Ane Santesteban WNT Rotor taldeko kirolariak, Ziortza Villa ziklistak, Eneritz Iturriaga Eneicat C.T. taldeko zuzendariak eta txirrindulari profesional ohiak, Maider Mayoral Kern Pharma taldeko fisioterapeutak, Mari Carmen Diaz de Lezanak eta Julia Liberal Arabako Federazioko presidenteak hartu zuten hitza.
Ainara Hernando kazetariak, azkenean, ezin izan zuen solasaldia bideratu, familia arazoen ondorioz. Hala ere, museoa jendez gainezka egon zen eta kirol munduan buru-belarri aritzen diren aipatutako emakumeek euren diziplinaren nondik norakoak azaldu zituzten.
Mahainguruak ia bi ordu iraun zuen eta, antolatzaileek adierazi dutenez, "argi utzi zuten emakumezkoen eta gizonezkoen kirola ezberdinak direla. Besteak beste, emakumezkoen esparruan inteligentzia erabiltzen delako gehiago, indarra baliatu ordez".
Horrez gain, antolakuntzak nabarmendu du hizlari lanetan oso ondo moldatu zirela emakume guztiak eta euren grina modu bikainean transmititu zutela.
Argazkiak: Artziniegako Txirrindulari Elkartea, La Karpy Marcha Ciclista Clásica