Artziniegako EAJk EH Bilduko udal gobernuari egotzi dio “EAJko aurreko gobernuaren lanaren kontura bizitzen ari dela”. Era berean, jeltzaleek, Encina Castresana zinegotziaren bidez, abertzaleen diskurtsoa gogor kritikatu dute, eta koalizioaren jokaera “mespretxuzkoa” dela gehitu dute: “Jaso duten herentziaz karga bat balitz bezala hitz egiten dute”.
Castresanak adierazi du EAJk aurreko legealdian egindako lanaren garrantzia azpimarratu nahi duela, eta “diru-laguntzen bidez irisgarritasuna edo saneamendua hobetzeko finantzaketa” bilatzearen zailtasunak aipatu ditu.
Era berean, horrelakoak aurrera eraman ahal izateko “denbora eta ahalegin politiko-teknikoa” behar direla gogoratu dute ere jeltzaleek.
Oharra plazaratu du EAJk abenduaren 19an egin zen ezohiko legebiltzarraren harira, non udal igerilekuen esleipena, Arabako Pentsionistak Laneanek bidalitako mozio bat eta EAJk pentsioen inguruan aurkeztutako emendakin bat aho batez onartu egin ziren, Alderdi Popularraren zinegotzia salbu, ez baitzen agertu.
Hala ere, ezohiko izate horrek, alkateari galde-eskeak egitea eragotzi ziela kritikatu dute ere, “2020ko aurrekontuak bezalako hain gai garrantzitsuen inguruan informaziorik ez dagoelarik”.
“Haiek utzitakoa kudeatu”
Alkateak, Joseba Vivancok, berriz, EAJk utzitako herentziaren kontra jo du. “Hiru obra handi ditugu mahaiaren gainean: igerilekuen erreforma, herriaren ur horniketaren aldaketa, eta Gordelizeko ur sarearen lotura. 2019ko abenduaren 31rako amaituta egon beharko ziren hirurak, baina ez dira ezta hasi ere egin; hori da EAJk utzi digun herentzia”, leporatu die jeltzaleei.
Harira, EH Bilduk, EAJk utzitako lanaren kontura ez direla bizitzen ari azpimarratu nahi izan du Vicancok, “haiek utzitakoa kudeatzeaz baizik”.
“Ez da oso azkarra izan behar ulertzeko aurten egiten ari garena 2019ko aurrekontuekin dela, EAJk aurrera eramandako aurrekontua”, gehitu du alkateak. Amaitzeko, jeltzaleek utzitako herentzia “ezta haiei” ez dietela opa esan, eta EAJko kideak aurrekontuen eta udal kudeaketaren inguruan galdetzera “animatu” ditu Artziniegako EH Bilduko buruak.