Arteko Gure Amaren Santutegira doan errepidea berritzeko akordioa sinatu dute

Hiriaren sarreraren biribilgunean hasten da errepide zatia. / GoogleMaps

Obretarako 2022-2023 Foru Planaren barruan eskatuko dute konponketa hori egikaritzea, Joseba Vivanco alkateak aurreratu duenez. Gauzak hala, obra hemendik lau urtera amaituta egotea aurreikusi du Artziniegako gobernuburuak.

Akordioa erdietsi zuten atzo Arabako Batzar Nagusietako batzarrean, aho batez, A-624 errepidearen Artziniegako zatia eraikitzeko. Onartutako testuaren arabera, Foru Aldundia elkarlanean arituko da Artziniegako Udalarekin, errepide hori nola atondu zehazteko.

“Herrira sartzeko biribilgunetik Arteko Gure Amaren Santutegira doan bidea da”, zehaztu du Joseba Vivancok.

Alkatearen esanetan, honakoa izango da etorkizuneko obra horien helburua: “udaletxetik igerilekuetara doan bide zatian bere garaian egin zenaren antzeko zerbait egitea”.

Lan hori egitearen garrantzia nabarmendu du gobernuburu artziniegarrak, eta aurreratu du hori egiteko eskaera tramitatuko dutela Obretarako 2022-2023 Foru Planaren barruan.

Gauzak hala, lanak hemendik lau urtera bukatuak egotea aurreikusi du alkateak.

Vivancok azaldu duenez, Elkarrekin Araba/Ezker Anitza/Equo taldea izan zen gaia mugitzen hasi zena, Etnografia Museotik Arteko Gure Amako Santutegira doan bidean espaloirik ez dagoela argudiatuta. “Aldunditik erantzun zitzaien bertan ezin zela lan puntualik egin, obra integrala izan behar zela”.

Gauzak hala, mozioa aurkeztu zuen talde politikoak Batzar Nagusietan, eta erdibideko zuzenketa tramitatu zen gero, talde guztiek sinatutakoa.

Vivancok eskerrak eman nahi izan dizkie Elkarrekin Podemoseko kideei eta baita EH Bilduko zein gainontzeko talde politikoetako ordezkariei ere, proposamenarekin bat egiteagatik.

Hala ere, alkateak nabarmendu du errepidea Santxotena Museoraino edota Barretaguren auzoraino iristea eskatuko dutela.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide