Hirugarren postuan zaudete, play-off postuetan. Zer balorazio egiten duzu momentu honetan?
Nahiz eta denboraldi hasiera kaskarra izan genuen, orain arteko balorazioa positiboa da. Bolada luze bat daramagu emaitza onak lortzen, eta horrek sailkapenaren goiko partean egotea ahalbidetu digu.
Tamalez, gure interesetarako behintzat, Frantziako federazioak play-offak kentzea erabaki zuen denboraldi honetan. Beraz, liga erregularra lehenengo postuan amaitzen duen taldea izango da txapelduna.
Zeintzuk dira taldearen helburu nagusiak denboraldi amaierari begira?
Taldearen helburu nagusia ligan aurreneko lauen artean sailkatzea da, eta kopako titulua berriro irabaztea.
Eta pertsonalak?
Pertsonalki, nire helburua beti da nire maila hobetzea.
Nola baloratzen duzu zure esperientzia Frantziako ligan?
Gaur egun, hona etortzeko erabakia egokia izan zelaren konbentzimendua dut, esperientzia ona izaten ari da. Beste kultura bat ezagutu dut, beste hizkuntza bat, beste areto futbol mota bat... Eta, gainera, titulu bat irabazi genuen pasa den denboraldian.
Atzerrian eman dituzu hainbat urte, herrialde eta liga ugaritan. Zer nabarmenduko zenuke esperientzia bakoitzaren inguruan?
Herrialde bakoitzak bere konplexutasuna dauka, eta ez bakarrik hizkuntzari edo jendearen ohiturei dagokienez, baita jokatzen den areto futbol estiloari dagokionez ere.
Datorren denboraldiari begira, zein da zure asmoa?
Momentuz, denboraldi honetan nago zentratuta. Maiatza hurbildu ahala, hurrengo denboraldian pentsatzen hasiko naiz.
Hainbat urte kanpoan eman eta gero, ba al duzu itzultzeko asmorik?
Urte asko eman nituen Espainiako ligan jokatzen. Beraz, ez da lehentasuna niretzako. Dena den, zer edo zer interesgarria ateratzen bada, zergatik ez?
Ligen arteko futbola jokatzeko eraren eta prestaera fisikoaren inguruko desberdintasunak aipatu dituzu. Zeintzuk dira Frantzian aurkitu dituzun ezaugarriak?
Oso liga fisikoa da eta arbitrajea malguagoa da. Teknikoki eta fisikoki oso onak diren jokalariak daude, baina taktikoki ez hainbeste. Hazkunde bete-betean dagoen liga da, urtez-urte.