Zazpi emendakin jarri dizkio Artziniegako EAJk 2020ko aurrekontuei

Artziniegako Udal Osoko Bilkuraren artxibo irudi bat. / Aiaraldea.eus

Jeltzaleek aurrekontuak oraindik aprobatuta ez egotea kritikatu dute ere, eta iazkoen luzapenarekin jarduteak “kontabilitatean desorekak” sortu ahal dituela gogoratu dute. Era berean, aurrekontuak egiteko metodo parte-hartzailea defendatu dute.

Artziniegako 2020ko aurrekontuei zazpi emendakin egin zaizkio EAJtik. EH Bilduko udal gobernuko kudeaketa kritikatu dute ere jeltzaleek. Euren aburuz, momentuz iazko aurrekontuen luzapena egin baitute, nahiz eta gehiengo osoa izan. Argudio bezala, “kontabilitatean desorekak” sor daitezkeela aipatu dute oposizioko alderditik, eta aurrekontuak egiteko prozesu parte-hartzaileak egin ez izana ere kritikatu dute. 

Lehenengo emendakina “pertsonal-gastuen aurrekontuko aurreikuspenen estimazioak zuzentzera” dago bideratuta. 2020rako %5,65eko igoera espero da iazko aurrekontuekin alderatuta, baina jeltzaleek “langileentzat ezarritakoaren gehikuntzari” soilik egokitzea eskatu dute.

“Berdintasuna bultzatzeko genero ikuspegidun udal-aurrekontuak egiteko”, baliabideak birbanatzea proposatu dute gizon eta emakumeen arteko “eskubide eta aukera berdintasunaren alde” lan egiteko, eta Berdintasun Jardueretara bideratutako aurrekontu partida 1.000 euro handitzea proposatu dute.

“Aurrekontuak egiteko metodo parte-hartzaileagoa” defendatu dute ere, “elkarte-mugimenduaren, herritarren eta alderdi politikoen presentzia zuzenarekin”, aurrekontuen “puntuak eta partidak xehetasunez landu ahal izateko”. Horren harira, udalak aurrekontuen %1 auzotarrek eta elkarteek proposatutako proiektuetara bideratzeko gordetzea eskatu dute ere.

Udal diru-laguntza publikoen atalean, kultura eta kirol jarduerak egiteko partida eskatu dute EAJtik, “jarduera guztiak diru-laguntzen deialdiaren bidez egin daitezen”. Bestalde, “hiri-altzariak berritzeko kapituluan”, hondakinak kudeatzeko “eredu jasangarri bat” proposatu nahi izan dute (birziklapen bereiziko hiri-paperontziak eskuratuta), baita hiri-altzariak erosteko aurrekontu partida 1.000 euro handitzea ere.

Artziniegako Museo Etnografikoari dagokionez, jeltzaleek esan dute ez dakitela zenbatekoa den “museoa irekitzeko gida-zerbitzuaren kostua”, momentuz 79.000 euro bakarrik baitaude aurreikusita: 50.00 Arabako Foru Aldundiatik, eta beste 29.000 euro udaletik.

Azkenik, inbertsioen inguruan egin dituzte proposamenak, iaz baino %28 gutxiago aurreikusi baita atal honetan. Honako bost neurri proposatu dituzte jeltzaleek: Ludoteka bat gaitzeko azterketa eta memoria ekonomikoa egitea, udal eraikinen EITak egiteko partida bat gaitzea, Geltoki Plazan haurrentzako jolas estalien gune bat sortzea, frontoiko aparkalekuaren alboko Vital Kutxaren lursaila erosteko dirua godetzea eta edukiontzien irlatxoak mugatzeko eta eusteko partida bat sortzea.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide