Iragan astean onartutako udal-aurrekontuak kritikatu ditu EAJk, “proiektu eta ideiak propiorik” gabekoak direla argudiatuta. Horren harira, “genero berdintasuna bultzatzeko, parte hartze handiagoko metodoa defendatzeko eta diru-laguntza publikoak hobetzeko” zuzenketak aurkeztu zituztela adierazi dute jeltzaleek, baina “bakar bat ere ez” onartzea leporatu diote udal gobernuari.
Oposizioko alderdiak ohar batean zehaztu duenaren arabera, Alderdi Popularrak landutako “pare bat” proposamen bakarrik jorratu ziren udalbatzan. Gainera, Artziniegako EAJko bozeramaileak, Encina Castresanak, alkatetzak bere alderdiaren kontrako jarrera duela saltu du: “Gobernu taldearen xede bakarra EAJ den orori eta pertsona guztiei etengabe uko egitea dela ematen du”.
Aurrekontuen kontinuismoa ere egotzi diote jeltzaleek udal gobernuari, eta anbizio falta kritikatu dute ere: “Kontu hauekin agerian geratzen da ez dagoela etorkizunari eta herriak aurre egin beharreko erronkei begirako anbiziorik”.
Alkatearen erantzuna
Osoko bilkuran jaso ziren beste gaiei begira, EH Bilduk ustelkeriaren aurka borrokatzeko aurkeztu zuen mozioaren inguruko argibideak eman dituzte ere jeltzaleek, eta Eusko Jaurlaritzako justizia laguntzen jarraitzea defendatzen dutela azaldu dute. “Ez da beharrezkoa Bilduk eskatzea, egiten ari dira”, gehitu du Castresanak.
Bestalde, “udalerriko zenbait gunetako argiztapen eskasa” ere izan zuten hizpide plenoan, “Bizilagunen beldurra eta ezinegona” argudiatuta, oposizioko taldeak “luminariak berrikustea eta herritarrei segurtasuna sortuko dieten neurriak” aztertzea eskatu zuen. Etxebizitzetako lapurreten inguruan “ahal diren neurri guztiak” martxan jartzea eskatu zioten ere udal gobernuari.
Era berean, Artziniegako alkateak, Joseba Vivancok, “esan beharrekoak osoko bilkuretan esatea, eta ez prentsa oharretan”, eskatu die jeltzaleei. EAJren aurreko udal gobernuaren kudeaketa ere kritikatu du alkateak: “EAJko gobernua ez bezala, honako hau ez da gestio presidentzialista izaten ari, udal zereginetako banaketa definitua baitago, guztion elkarlanarekin”.