Harry Potterren unibertsoan girotutako orri-markatzaile lehiaketa egingo da Artziniegako liburutegian. Magia erabiltzekotan, hobe zenuke Hogwartsen ikastea zure denbora librea orri-markatzaileak egiten pasatzea baino. Muggle bat baldin bazara (ez-magoa, irakurle estatubatuarrentzako), ordea, martxoaren 6ra izango duzu zure lana aurkezteko epea.
Markatzaileak gutun-azal batean aurkeztu beharko dira, horren kanpoaldean “Irakur puntu lehiaketa” leloa jarrita. Tamalez, Hedwig hontzak ezingo du gutuna bidali, zazpigarren liburuan hiltzen baita. Baina, spoiler hau eta gero, eskuan eramatea gomendatzen dela zehaztu beharra dago.
Beste gutun batean, egilearen izen-abizena, adina eta telefonoa zehaztu beharko dituzte partaideek. Irabazleen izen-abizenak martxoaren 13an erakutsiko dira liburutegian. Garaileei liburu sorta bat emango zaie. Lanak entregatzeko epea otsailaren 4an hasi zen, baina hirugarren pelikulako Time Turner madarikatu hori (Bill Murrayren jostailu gogokoena izan ahalko litzatekeena) zure buruan baino existitzen ez denez, komenigarria izango da lanean ahalik eta lasterren hastea.
Orri-markatzaileek neurri finkoak izan beharko dituzte, zortzi zentimetroko zabalera eta hogei zentimetroko altuera, hain zuzen ere. Bost kategoria egongo dira: 4-6 urtekoentzakoa, 7-9 urte bitarteko umeentzako, 10 eta 12 tartekoentzako, 13-17ko nerabeentzako eta 18 urtetik gorako beteranoentzako. Has daitezela gosearen jokoak!