Artziniegako Bizindar taldea Letterkenny hirian dago, Irlandan. Berez, Munduko Goma Gaineko Sokatira Txapelketan arituko dira gaur kategoria mistoan -emakumezkoak eta gizonezkoak batzen dituena-, 580 kilo azpiko esparruan. Hiru neskek, sei mutilek eta entrenatzaileek osatzen dute ordezkaritza, goma gainezko modalitatean.
Aintzane Lafragua Bizindarreko kideak azaldu du "urtebetez gogor entrenatu dutela" lehiaketan izena emateko eta Munduko Txapelketan esperientzia lortzea dutela helburu. "Ondo pasatzea da gure helburua, baita tirada batzuk irabaztea", adierazi du Lafraguak.
Proba gaur hasiko da eta bihar arte klubek euren indarrak neurtuko dituzte. Larunbatean eta igandean, ordea, herrialde bakoitzeko selekzioak lehiatuko dira. Aintzane Lafraguak argitu duen moduan: "Euskadiko Txapelketako irabazleak Basque Countryren izenean jokatuko du".
Artziniegako Udalak aipatu du eskoziar, alemaniar, hegoafrikar, japoniar, txinatar eta nigeriar taldeez gain, ia 40 euskal taldek hartuko dutela parte, 10 klub ezberdinetakoak: Antsoain, Berriozar, Beti Gazte eta Txantrea, Nafarroakoak; Gaztedi eta Murueta, Bizkaikoak; Badaiotz eta Bizindar, Arabakoak, Ibarrakoak, Gipuzkoakoak eta arestian Zuraide, Iparraldekoak.