Aiaraldearrek ez dute aukerarik galdu ilargi erraldoiari argazkia ateratzeko. Kanarietako Astrofisika Institutuaren arabera, urtean 3 eta 5 "superilargi" artean egoten dira.
Zergatik ikusten da ilargia hain handi?
Funtsean, ilargi betea ilargi perigeotik gertu dagoenean gertatzen da. Berezitasunen artean orbita ez zirkularra nabarmentzen dute adituek, elipsea baita. Lurra eta ilargiaren arteko distantzia ezberdina izaki, tamaina eta distira ere aldatu egiten da. Egoera berezi hori 28 egunez luzatzen da, ilargiak lurrari bira ematen behar duen denboran. Alabaina, ilargi beteari atxikitako fenomenoa izanik, urtean zehar errepikatu egiten da: otsailean, martxoan, apirilean eta maiatzean, hain zuzen.
Alberto Martinez Gutierrez-Barquin izan zen argazkiak ateratzeko aukera aprobetxatu zuenetako bat. Sare sozialetan kontatu duenez, "4:36ean izan dugu urteko ilargirik handiena". Ohikoan baino %7.7 handiagoa izan da, azaldu duenez: "Labur azaltzearren... 2020an lurretik gertuen egongo den unea da, zehazki 357.022 kilometrora".