Artziniegak, Espainia eta Euskal Herria osoko beste hainbat herrik bezala, bonbardaketak jasan zituen Guda Zibilean zehar, Alberto Martinez Gutierrez-Barquin bizilagunak eginiko ikerketa batean azaltzen denez. Nahiz eta beste herrietako erasoak (Gernika eta Durango, esaterako) bezain sonatua ez izan, bando nazionaleko hegazkinek lehergaiak jaurti zituzten herrian eta inguruko hainbat gunetan.
Bi bandoek, nazionalek eta errepublikaren aldekoek, Breguet XIX hegazkina, “Alcahuete” bezala ere ezagutua, erabiltzen zuten araketa hegazkin edo bonbaketari arin moduan. Hortaz, horrelako bat herritik pasatzen zen bakoitzean, kanpaiak jotzen zituzten eta biztanleek babesa bilatzen zuten.
Isabel Lopezek hirigunean hiru bonba bota zituztela adierazi zion ikerlariari: Eskolako patioan (gaur egungo liburutegi eta nagusien egoitza), Garaitarren jauregiko kotxe-tokietan eta gaur egungo museoaren azpian dauden etxebizitzetan (abangoardiako ospitalea zen garaian). Jauregian, hain zuzen ere, gerlari errepublikarrak zeuden ostatatuta. Bonbardaketa hauek Sol egunkariko La Guerra en Euzkadin jazo ziren garai hartan.
Iturri pertsonalak ere erabili ditu Martinezek gatazka amaitu eta hainbat urtera zonaldean bonbak agertu izan zirela azaltzeko. Esaterako, Imanol Aretxabaletaren adierazpenak plazaratu ditu, nork aspaldi jaurtitako bonba baten eztandak Peñalban sutea hasi zuela ziurtatu zion. Dena den, ez dakite oraindik lurrera heldu zenetik zenbat denbora igaro zen eztanda egin arte, edota eztanda horren zergatiak zeintzuk izan ziren.
Bonbardaketei aurre egiteko, aipatu bezala, babes antiaereoak erabili zituzten herrian. Adibidez, Agustina mojetako komentuan bat eraiki zuten, nahiz eta ez dagoen argi nori ematen zion babesa: Artziniegako garaiko biztanleei, gudariei edo biei.
Norzagaraitarren etxea (gaur egungo Barrenkale kalean) lurpeko babes bezala erabili izan zuten, hormigoizko bodega bat baitzuen. Lehen zehaztutako Garaitarren jauregitik (printzipioz bonbardaketen kontrako beste babes bat han eraikita zegoela argitaratu zuten garaian, baina gaur egun ez dago horren frogarik) eta komentutik aparte, lurpeko beste hainbat bodega eta zulo ere erabili zituzten artziniegarren bizirauteko, hala nola Garabillako baserri bateko zuloa, Reteseko kobazuloa edo Axpeko urbanizazioko hormigoizko depositu bat.