Garay plaza hautatu zuen atzo EH Bilduk hauteskunde kanpainako ekitaldia egiteko. Eba Blanco koalizioko 2. hautagai arabarra eta Oskar Matute diputatua izan ziren protagonista nagusiak.
Tokiko udal ordezkariek aurkeztu zuten mitina eta Eba Blancoren txanda izan zen lehenik eta behin. Amurriorrak Joseba Vivanco alkatearen ama gogoratu nahi izan zuen, COVID-19aren ondorioz hil baitzen martxoaren amaieran. Horren harira, senideak galdu dituen pertsona oro omendu nahi izan zuen Blancok, eta salatu zuen pandemiak agerian utzi duela sistemak ahuldade handiak dituela.
Horren arrazoia, EH Bilduko kidearen aburuz, da Eusko Jaurlaritzak porlana jartzen duela osasunaren gainetik eta horren adibide moduan, Amurrioko anbulatorio berria aipatu zuen: "Eraikina berria da, baina ez dago zerbitzu berririk". Zentzu horretan, Blancok goraipatu zituen zaintzetan zentratu diren pertsonak, bereziki emakumeak: "Lotsagarria da egun oraindik emakumezkoen eta gizonezkoen arteko soldata arrakala mantentzea, are gehiago eurek zaintzen pisua bere gain hartzen dutenean".
Egoera ekonomikoari erreparatuta, amurrioarrak azpimarratu zuen Aiaraldeko langabezia datuak okerragoak direla Araba edo Euskal Herriarekin alderatuta, eta horretarako eurek proposatutako industria plana eta eskualdeari buruzko ponentzia beharrezkoak direla nabarmendu zuen. Ponentzia horri dagokionez, Blancok ziurtatu zuen EAJk trabak besterik ez zituela jarri Eusko Legebiltzarrean lantzerako orduan.
Oskar Matuteren hitzartea
Oskar Matuteren txanda heldu zen gero, Joseba Vivanco alkateak aurkeztuta. Matute Artziniegako alkatea bera aipatzen hasi zen, pandemiaren alderik gogorrena bizi izan baitzuen. Berez, EH Bilduko ordezkariak errepikatu zuen COVID-19aren krisialdiak agerian utzi duela zein garrantzitsuak diren zaintzak: "Iñigo Urkulluk kontrakoa erakutsi arren, bizitza da garrantzitsuena, eta ez ekonomia. Urkulluk esaten du ezkertiarra dela, baina Confebasken agindura dago".
Izan ere, Matute oso kritikoa izan zen Lehendakariarekin eta EAJrekin bere hitzartzean: "Hemendik barre egiten dugu Madrilgo 'Cayetanoak' direla medio, baina jeltzaleak dira gure 'Cayetanoak'. Nagusien egoitzetan sartu dira negozioa egiteko, dirua ematen duelako, eta horren ondorioz pertsona asko hil dira".
Bide beretik, Matutek esan zuen enpresen administrazio kontseilariek ez diotela ekarpenik egin gizarteari koronabirusaren krisialdian, euren etxeetan goxo egon baitira eta, gainera, dirutza egin dute.
Ordea, alarma egoerak erakutsi du, Matuteren ustez, "birjartzaileek, garraiolariek edota erizainek ez dutela lotsarik izan behar euren lanpostuari buruz hitz egitean, ezinbestekoak direla probatu baitute".
Azkenik, Madrilen asteazkenean izandako saioari buruz mintzatu zen Oskar Matute eta gogor kritikatu zituen PSOE eta EAJ: "Batak lan erreforma bertan behera uztearen kontra bozkatu zuen eta bestea abstenitu zen, nahiz eta lan erreforma ona ez dela esaten duen". Halaber, jeltzaleekerreforma fiskalaren eta zabortegi irregularrak ez onartzearen kontra -Zaldibarrekoa bezalakoak- bozkatu zutela salatu zuen EH Bilduko diputatuak.