Gaur izan da uztaileko udalbatza Artziniegan eta igerilekuen egoera izan da eztabaidagaia. Joseba Vivanco alkateak argitu du atzo egin zutela bilera eraikuntza enpresarekin eta horrek jakinarazi zuela obrak abuztuaren erdialdera arteluzatuko direla. Hau da, ekainean esandakoarekin alderatuta, hilabete beranduago egongo da azpiegitura prest.
Alkateak erantsi du lanak bukatu ostean, gainera, astebete beharrezkoa dela ziurtatzeko igerilekuen funtzionamendua egokia dela: "Ez dugu nahi hurrengo urtean arazoak agertzea. Hortaz, arazteko sistema eta abar patxadaz probatu nahi ditugu".
Obrak behin bukatuta, beste astebete beharko du udalak ziurtatzeko igerilekuen funtzionamendu zuzena.
Oposizioaren galderen aurrean, Vivancok argitu du EH Bilduren asmoa azpiegiturak irekitzea dela: "Ez dakigu zein izango den eredua, bi astez edo astebetez bakarrik ireki ahal badugu, agian doan izan beharko da. Edonola ere, esan bezala, tarte horretan denbora izango dugu lanak ondo egin dituztela bermatzeko".
Epe barruan, momentuz
Pandemiaren ondorioz, martxotik apirilera bitartean geldirik egon ziren obrak igerilekuetan, besteak beste, materialak ez zirelako heltzen atzerritik. Edonola ere, udal taldeek uste dute enpresak ez dituela behar beste langile bideratu lanetara.
Hori dela medio, udalak baloratuko du, kontratuaren arabera, zer nolako neurri har ditzakeen atzerapenagatik. Dena den, momentuz, epeen barruan ari da enpresa lanean.