Campilloko begiratokian kokatu dute eskultura multzoa. Lau piezaz osatua dago bilduma, eta Artziniegako sortzaileek egin dituzte beren-beregi herriko bizitza eta historia omentzeko. Benjamin Respaldiza apaizak proposatu zuen ideia iragan lege-agintaldian, eta 1.500€ bideratu ditu udalak gauzapenera.
Lau piezako multzoa
Lau ataletan banatu dute esanahia, baina denek dute zerbait komunean: udalerriko armarria irudikatzen dute batuz gero; hots, hiru dorre eta zuhaitza. Artziniegan duen garrantziagatik, artea da zuhaitza. Horrez gain, dorreek herriari lotutako elementuak dituzte goiko aldean: Arteko Gure Ama santutegia, Luciano kaleko aldapan zegoen defentsa dorrea, eta "Ordunte" hitza. Izan ere, "Ordunte" kontzeptuak ordezkatzen ditu Artziniegari lotutako Soxoguti, Erretes Tutera, Mendieta eta Santa Coloma herriak.
Barne aldean, berriz, arteari lotutako Artziniegako hiru museoei egin diete tartea. Hala, Museo Etnografikoaren omenez laia ikusi daiteke dorreetako batean, arte sakroaren seinale den gurutze zahar bat, eta Santxotena museoak sortutako "emakume buru baten abstrakzioa".
Ekimena kolektiboa izan da, Artziniegako Udalak azaldu duenez. "Eskerrik asko atzo Alde Zaharreko eskulturen azalpenera bertaratu zinetenei, eta bereziki, esker handia haien autoreei zuen lanagatik Artziniegaren alde", erantsi dute sare sozialetan. Hain zuzen, ekimen parte hartzailea izan da. Benjamin Respaldiza sustatzaileak aurkezpenean kontatu zuenez, "herriak egin ditu eskulturak". Batzuek makinaria jarri dute, beste batzuek lurra, harria...
Lanak ikusgai daude asteburutik edonorentzat. Artziniegako bizitza, artea eta ondarea osasuntsu daudenaren adierazle.