Laudion jokatutako herri kiroletako Arabako finalek Artziniegako bi txapeldun utzi zituzten. Alde batetik, Guillermo Lopezek eskuratu zuen zaku-eramatean markarik onena, eta Aritz Iturribarriak, gauza bera egin zuen lokotx bilketan. Lopez lehenengo aldiz izan da irabazlea, baina Iturribarriarentzat 8. txapela da 2013an lehiatzen hasi zenetik.
80 kilogramo bizkarrean
Guillermo Lopez pozik dagoela ziurtatu du: "Lehenengo aldiz irabazi dut, 7 edo 8 urtez parte hartu eta gero". Proba ez da samurra, ordea: kirolariek 80 kiloko zakua jarri behar dute bizkarrean, eta 120 metroko ibilbidea osatu ahalik eta lasterren.
Alberto Acero plazan ezin zituztenez 120 metroak zuzen zeharkatu -oholtzaren ondorioz- 20 metroko tartea prestatu zuten, eta 3 aldiz joan eta etorri ziren. Lopezek argitu du buelta ematea erronketako bat zela: "Hor zakua eror daiteke eta berriro bizkarrean jartzeko denbora ugari galtzen da. Berez, hori gertatu zitzaion Angel Gomez faboritoari, jausi egin zitzaion eta segundo garrantzitsuak galdu zituen".
Guillermo Lopezek arazo gabe bete zuen ibilbidea, erorketarik gabe, eta 37 segundotan amaitu zuen dena, ostiralean egindako onena, hain zuzen ere.
Guillermo Lopez lehenengoz izan da txapelduna zaku eramatean, baina Aritz Iturribarria 8 aldiz jarraian da irabazle Arabako lokotx biltzean
8. aldiz txapeldun
Aritz Iturribarriak, ordea, faboritoaren aurreikuspenak bete zituen; eta berriro txapeldun izan zen. Ezustea izan ez bazen ere, emaitza ontzat jo du Iturribarriak: "Irabaztearekin baino, urteak pasa eta gero hobeto egiten dudalako pozik nago. Proba hau da Euskal Herriko Txapelketan aritzeko irabazi behar dena -herrialde bakoitzeko lehenengo bi sailkatuek hartzen dute parte-. Proba horretan giro ona sortzen da eta maila altua ikusten da, sekula ez dut lortu irabaztea 8 urteetan. Baina aurten bizi ari garen egoerarekin ez dakit posible izango den egitea, momentuz ez dute datarik jarri".
Iturribarriak eskualdeko lasterketetan maiz ematen du izena. Esaterako, 2017an Arabako Mendi Lasterketako Kopa irabazi zuen, hortaz, abiadura eta erresistentzia lantzen ditu ohikoan: "Entrenamenduen aldetik, nahiko desberdina da prestaketa, baina pentsatzen dut lasterketetan ondo aritzen den edozeinek ondo egingo lukeela proba hau. Aurten, adibidez, lasterketak ez direnez egon, proba honetan gehiago zentratu naiz, entrenamendu laburragoak baina biziagoak eginda".
Artziniegarrak, hala ere, lehiatzea du gogoko eta horregatik lokotx biltzean aritzeko deia zabaldu du: "Pena da Araban hain parte hartze txikia egotea. Aurten 4 apuntatu gara, eta azken urteetako parte hartze altuenetarikoa izan da. Lehen aipatu dudan bezala, korrikan aritzen den edozeinek ondo egingo luke, eta eskualdean korrikalari asko daude, baita Gasteiz aldean ere. Proba gogorra da, baina 7 minutu inguru irauten ditu".
Berez, ostiraleko finalean Guillermo Lopez izan zuen aurrez aurre, baina Lopezek aitortu bezala, "ezinezko izan zen Aritzi irabaztea, oso ona da eta".
Finala Artziniegan
Asteburu honetan, igandean eguerdian hain zuzen, izango dira Arabako trontza finalak Artziniegan. Alabaina, printzipioz, herriko kirolariek ez dute parte hartuko, ezin izan baitute ganoraz prestatu pandemiaren ondorioz.
Argazkiak: Egoitz Elorza eta Joseba Amondo