Osasuna mantentzeko egunero paseatzeko ohitura du Mateo Lafragua artziniegarrak. Hala aitortu dio Aiaraldea komunikabideari. Bere sare sozialak dira horren lekuko: txango ezberdinen argazkiak argitaratzen du.
Izan ere, Artziniegako inguruek aukera ugari eskaintzen dituzte landa eremuaz gozatzeko. Artziniegako lakuari itzulia ematea da ibilaldi horietako bat. "Burgoserako bidean dago Artziniegako lakua, baina Artziniegatik ere bertara daiteke", dio.
Oinez joateko Erretes Tuteratik joan daiteke, "2 ordu inguru behar dira Artietaraino ailegatzeko".
Auto edo ibilgailuan hurbiltzeko, berriz, Artieta herrirako bidegurutzea hartu behar da. Erretes Tuteratik oinez ibiltzea nahiago dutenek, aldiz, 3 ordu inguru behar dituzte Lafraguaren ustez ibilbide osoa egiteko.
"Artietarainoko paseoa ere oso polita da. Gainera, badu bere historia: kuartela eta eskola egon ziren, besteak beste", azpimarratu du.
Lakutik Viergolera ordubeteko bidea dago, artziniegarraren hitzetan, "guztira 2 ordu dira". 35 minutu inguru behar dira tokiraino pausoka heltzeko.
"Artziniegako lakua oso polita da, Gorobel mendizerra ikusten da uneoro. Familia txangorako egokia da, oso erosoa, laua delako". Bizikletaz ere zeharka liteke.
Ibilbide gehiagoz galdetuta, zerrenda luzea du Lafraguak: "Lastra zubitik Lantenoko elizara, Ventatik Cirionera...". Nahi duenak, beraz, ez du aukera faltarik.