Herritarren eskubideak urratu ditu EH Bilduk, EAJren iritziz. Joseba Vivanco alkateak, gobernu taldearen izenean, bidalitako gutun baten harira atera dute jeltzaleek oharra. Besteak beste, Datuak Babesteko araudia urratzea leporatu diete.
"EAJko udal taldetik gure haserrea adierazi dugu. Izan ere, herriko familiei zuzendutako gutunean alkateak herrian gertatutako ekintza bandaliko eta gizalegegabeei aipamen zuzena egiten die, eta ekintza guztien erantzukizuna bidegabeki egozten du".
Jeltzaleen aburuz, postontzietan banatutako idazkia eta herriko haur zein gazteen errealitatea ez datoz bat. "Garrantzitsua da errebeldia ez nahastea ekintza bandalikoekin eta intzibismoarekin, ez baitira justifikatzen", erantsi dute.
Horrez gain, gazteria alorrean alkateak aurrekusitako neurriez galdetu dute, eta erantzunak "etorkizunerako aurreikuspenik gabeko estrategia bat" utzi du agerian, EAJren hitzetan.
EH Bilduren gobernu taldeak, bere aldetik, bere jokabidea eta herritarrak informatzearekiko konpromisoa defendatu ditu.