Tokiko merkataritza laguntzeko ekimena aurkeztu du Artziniegako Udalak. Zehazki, "lagun ezkutua" jolasa egingo dute, baina herrira mugatuta. Tokiko erakundeak azaldu duenez, herritar batek proposatu zien ideia, aurtengo urtea berezia dela-eta.
Hala, "Artziniegan bizi eta erosi" egitasmoaren barruan kokatu dute ekintza. Ekimenean parte hartzeko beharrezkoa da posta elektronikoa izatea. Hain zuzen, lagun.invisible.artzi@gmail.com helbidera bidali beharko da mezua, izen-abizenak eta adina aipatuta. "Apuntatzean itzuli beharreko inprimaki bat bidaliko zaizu, zure datuak kanpaina honetan erabiltzeko baimena emateko", adierazi dute antolatzaileek. Izena emateko epea azaroak 16-25 bitartean egongo da zabalik.
Zozketa digitalki egingo dute, aplikazio informatiko baten bidez. Horrenbestez, mezu elektroniko bidez jasoko dute partaideek beraien lagun ezkutua. Adinaren arabera, haur eta helduen kategoriak bereizi dituzte, baita gehieneko gastua ere. Lehenbizikoan 5-10€ erabili ahalko dira; eta bigarrenean, helduenean, 10-20€.
Oparien banaketa
Opariak abenduaren 18an emango dituzte. "17:00etatik 19:00etara opariak entregatuko dira frontoian, eta 20:00etatik 22:00ak arte egongo da jasotzeko aukera. Alabaina, ezinbestekoa izango da erosketa tiketa entregatzea, "antolatzaileek erosketa Artziniegan egin dela egiaztatzeko".
Udalak, babesle izanagatik, "opari sorpresa" bat zozketatuko du ekimenera batzen diren herritarren artean.