Artziniegatik kanpo kokatu du Santxotena Museoak Jaiotzen Nazioarteko Erakusketaren XXII. edizioa. Deustoko EXPO Center aretoan egongo dira piezak ikusgai.
"Artziniegako Santxotena Museoan ezinezkoa zen urteroko erakusketa antolatzea", azaldu du Teresa Lafragua bildumaren arduradunak, "espazio txikia izanik, protokolo sanitarioak betetzea ezinezkoa da orain arteko kokalekuan". Horregatik erabaki zuten Artziniegatik kanpo antolatzea erakusketa.
Jaiotzak Artziniegatik Bilbora eramatea lan handia suposatu duela azaldu du Lafraguak. Guztira, bildumako 1.313 pieza daude Deustoko aretoan ikusgai.
Abenduaren 4ean zabaldu zituen ateak Bilboko erakusketak eta urtarrilaren 31ra arte egongo da ikusgai.
Buztingintzari aitortza
Buztingintzak espazio berezitua izango du aurtengo erakusketan. Buztinez egindako estatu osoko piezak bildu dituzte, buztinlariei omenaldi txiki bat egiteko asmoz.
Guztira, munduko bost kontinenteetako piezak biltzen ditu bildumak eta Europako bildumarik garrantzitsuenetarikoa da. Hainbat herrialdeetako etnografia ezagutzeko parada eskaintzen dute bilduma osatzen duten 2.207 piezek.